«Ўзтрансгаз» АЖ бошқаруви раиси Беҳзод Норматов Ўзбекистондаги энерготақчиллик мавжуд газни четга экспорт қилиш ортидан юз бераётгани ҳақидаги фикрларга муносабат билдирди. У, шунингдек, мамлакат қанча газ сотаётгани ва қанчасини импорт қилаётгани хусусида ҳам маълумот берди.
Агар олдинги рақамлар билан бу йилги рақамларни таққосласангиз, камида уч баробар оз газ экспорт қилдик. Чунки Ўзбекистонда электр станциялар кўп қурилди, иқтисодиётимиз ривожланяпти, кўп газ истеъмол қиладиган корхоналар пайдо бўляпти, аҳоли сони ўсяпти.«Ўзтрансгаз» раҳбари қуйидаги саволларга ҳам жавоб қайтарди.Кунлар совиб кетиши билан барча давлатларга, шу жумладан, Хитойга қилинаётган газ экспорти ҳам 100 фоизга тўхтатилган ва аҳоли истеъмолига йўналтирилган. Импортга келадиган бўлсак, қиш фаслида қўшни мамлакатлардан газ сотиб оляпмиз. Бу йил харид қилинган газ миқдори ўтган йилги билан бир хил кўрсаткичга эга, — дейди Норматов.
Аҳолига етказиб берилаётган газ кўрсаткичи пасаймаган бўлса, нега бу йил вилоятлар марказлари, ҳаттоки пойтахтда ҳам газ етишмовчилиги кузатиляпти?
— Газ истеъмоли ҳажми бутун республика бўйича ошган. Аммо ресурслар ошмаган. Янги ишлаб чиқариш корхоналари, янги хонадонлар пайдо бўляпти, аммо ресурсларимиз ўша-ўша.
Газ экспорти қачонгача тўхтатилган?
— Вазият барқарорлашгунча. Керак бўлса, қиш тугагунча.
Ўзбекистоннинг чет элга газ сотиш бўйича қандайдир мажбуриятлари борми?
— Ўзбекистонга инвестиция киритган чет эл корхоналари бор. Ушбу лойиҳалар бўйича маълум мажбуриятларни ўз бўйнига олган. Бу мажбуриятларни бажариш учун қазиб олинаётган газнинг бир қисмини экспорт қиламиз. Илгари улар қазиб олаётган газ 100 фоиз экспорт қилинган бўлса, бугунги кунда бу кўрсаткич йил давомида 15—20 фоиздан ошмайди.
Қачон экспорт қиламиз?
— Асосан, баҳорда, ёзда ва кузнинг бошларида. Газ ва электр кўп истеъмол қилинмайдиган баланс пайтида шу мажбуриятлар бажарилади.
Газ муаммоларини бартараф қилиш учун қандай ишлар қилиняпти?
— Айтиб ўтганимдек, биринчи навбатда, экспортни тўхтатдик. Импорт ҳажмларини ошириш бўйича музокаралар олиб боряпмиз. Катта ҳажмда газ истеъмол қиладиган катта корхоналар фаолиятини вақтинча тўхтатяпмиз. Масалан, цемент заводлари, Максам-Чирчиқ, Фарғона азот, Навоий азот корхоналари фаолияти тўхтатилди. Бундан бўшаган барча ресурслар аҳоли истеъмолига йўналтирилмоқда.
Нима учун айнан бу корхоналар танланди?
— Чунки, биринчидан, улар кўп газ истеъмол қилади, иккинчидан улар ишлаб чиқарадиган маҳсулотни импорт қилса бўлади. Яна бир чора — метан газ заправкалари фаолиятига киритилган чекловлар. Ўйлайманки, аҳолимиз бу вақтинчалик чекловларни тўғри тушунади. Бу орқали биз ўша заправка атрофидаги аҳоли пунктларини газ билан таъминлашга ҳаракат қиляпмиз. Ҳаво ҳарорати яхшилангани сари бу чекловлар аста-секин бартараф этилади ва заправкалар фаолияти тўлиқ тикланади.
Изоҳ (0)