Қаршида Cobalt ҳайдовчиси йўлни кесиб ўтаётган қизни уриб юбориб, воқеа жойидан қочиб кетди. Бу ҳақда вилоят ИИБ матбуот хизмати хабар берди.
5 декабрь куни соат 20:10 ларда вилоят ИИБ 102 тизимига тушган хабарга кўра, шу куни тахминан соат 20:00 ларда Қарши шаҳар, Насаф кўчасида жойлашган супермаркет рўпарасидаги пиёдалар ўтиш йўлагидан ўтаётган вояга етмаган қиз Х.Д.ни давлат рақам белгисисиз оқ рангли Cobalt уриб юборган.
Ҳайдовчи ҳаёти ва соғлиғи хавф остида қолган пиёдага ёрдам кўрсатмасдан, ҳодиса содир бўлган жойдан яширинган. Натижада Х.Д. тан жароҳати олиб, шифохонанинг жонлантириш бўлимига ётқизилган.
Мазкур ҳолат юзасидан Қарши шаҳар ИИО ФМБ ҳузуридаги ТБ томонидан Жиноят кодексининг 266-моддаси 1-қисми ва 117-моддаси 1-қисми билан жиноят иши қўзғатилган. Ҳолат юзасидан вилоят миқёсида автомашинани қидириб топиш бўйича ишлар ташкиллаштирилган.
Мавзуга доир:
Изоҳ (0)