Аҳолига газ етказиб беришни ошириш мақсадида Фарғона водийсидаги заправкалар иши вақтинча тўхтатилди

«Ўзтрансгаз» Фарғона водийси вилоятларидаги газ заправкалар иш фаолияти вақтинча тўхтатилганини эълон қилди.

Қайд этилишича, об-ҳаво совиб кетиши туфайли аҳоли, ижтимоий соҳа объектларининг табиий газга бўлган эҳтиёжи ортгани боис уларга табиий газ етказиб бериш долзарб ҳисобланади. Шуни инобатга олиб, Фарғона водийси вилоятларидаги автомобилларга газ тўлдириш компрессор станциялари 7 декабрь куни соат 11:00 дан вақтинча иш фаолиятини тўхтатди.

«Вазият изга тушгач, одатий иш фаолиятига қайтилишини маълум қиламиз. Келтирилган вақтинчалик ноқулайликлар учун истеъмолчилардан узр сўраймиз», — дейилади хабарда.

Бундан аввал Тошкентда имкон қадар кўпроқ хонадонларни газ ва иссиқлик билан таъминлаш мақсадида, жамоат транспорт воситаларига хизмат кўрсатадиган шохобчалардан ташқари, қолган барча автомобилларга газ қуйиш шохобчалари вақтинчалик ёпилганди.

Мавзуга доир:

• Метан заправкаларда инқироз — душанба оғир ўтади, ваъда ваъдалигича қолди
• «Бу ҳали ҳолваси бўлиши мумкин» – ўзбекистонликлар электр ва газ таъминотидаги узилишлар оқибатидан хавотирда