Toshkentda Lacetti Nexia-3 bilan to‘qnashib, olti nafar piyodani ham urib yubordi

Toshkentning Uchtepa tumanida besh kishining tan jarohat olishi va ikki kishining o‘limi bilan yakunlangan YTH yuz berdi. Bu haqda poytaxt IIBB matbuot xizmati xabar qildi.

Ma’lum qilinishicha, 4-dekabr kuni taxminan soat 06:15 larda Uchtepa tumani Farhod ko‘chasi 2-uy ro‘parasida 1996-yilda tug‘ilgan R.I. Lacetti’ni boshqarib ketayotganida 1982-yilda tug‘ilgan A.A. boshqaruvidagi Nexia-3 bilan to‘qnashib, olti nafar piyodani ham urib yuborgan. So‘ng yo‘l chetida harakatsiz turgan 1995-yilda tug‘ilgan M.V. boshqaruvidagi Matiz’ga borib urilgan.

Oqibatda Lacetti haydovchisi hamda to‘rt nafar piyoda (1974-y.t. N.S., 1986-yilda tug‘ilgan M.U., 1987-yilda tug‘ilgan Yu.Sh., 1994-yilda tug‘ilgan E.M.) turli darajadagi tan jarohatlari bilan RSHTYOIMga yotqizilgan. Ikki nafar piyoda (1960-yilda tug‘ilgan Q.X., 1982-yilda tug‘ilgan G.F.) olgan tan jarohatlari natijasida vafot etgan.

Dastlabki ma’lumotlarga ko‘ra, yo‘l-transport hodisasiga Lacetti haydovchisi tezlikni me’yoridan oshirib, rul boshqaruvini yo‘qotgani sabab bo‘lgan.

Holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 3-qismi bilan jinoyat ishi qo‘zgatilgan. Tergov harakatlari olib borilmoqda.