Ўзбекистонда бир дақиқада 9 метр квадрат чўлланиш рўй бермоқда. Бу ҳақда Тошкент шаҳрида 5 декабрь куни иқлим ўзгаришларининг Ўзбекистон аграр соҳасига таъсири мавзусида бўлиб ўтган йиғилишда маълум қилинди, дея хабар бермоқда «Дарё» мухбири Абдуқаҳҳор Қосимов.
Дунёда табиий ресурслардан фойдаланиш илмий-тадқиқот институти (WRI) тадқиқотларига кўра, қишлоқ хўжалигида сувдан фойдаланиш шу зайл давом этаверадиган бўлса, 2030 йилга бориб Ўзбекистон дунёдаги 33 та сув танқис давлатлар қаторига тушиб қолиши мумкин.
Тадбирда иштирок этган қишлоқ хўжалиги вазири Азиз Воитовнинг маълум қилишича, ҳарорат ва ёғингарчиликнинг ўзгариши, сув тошқинлари, қурғоқчилик ва бошқа экстремал об-ҳаво ҳодисаларининг кўпайиши Ўзбекистоннинг кўплаб ҳудудларида аллақачон экинлар ҳосилдорлиги ва чорвачилик маҳсулдорлигига таъсир ўтказмоқда.Бу аҳолининг озиқ-овқат таъминоти барқарорлигига хавф туғдиради. Таҳдидларга қарши бирга ҳаракат қилишимиз керак. Ўсиб бораётган иқлим таҳдидларидан секторни ҳимоя қилиш тадбирларини кучайтирмасак, озиқ-овқат маҳсулотларининг сифати, миқдори пасайиши, нархларнинг кўтарилиши давом этаверади, — дейди вазир.
Азиз Воитовнинг қўшимча қилишича, иқлим муаммоларининг аграр озиқ-овқат сектори ва иқтисодиётга эҳтимолий таъсирлари ҳали тўлиқ маълум эмас.
Иқлим ўзгариши деҳқон, фермерлар ва агротадбиркорларнинг даромадларига салбий таъсир қилади, — дейди у.
Ўзбекистонда сув танқислиги муаммоси
БМТнинг Озиқ-овқат ва қишлоқ хўжалиги ташкилоти сармоя бўлими иқтисодчиси Андрий Ярмак Ўзбекистонда артезиан сувлардан кўп фойдаланиш бўйича хавотирларини билдириб, бунинг оқибатида мамлакатда ичимлик суви танқислиги келиб чиқишини айтганди. Унинг фикрича, яқин йилларда Ўзбекистонда мева-сабзавот етиштиришнинг ўсиш суръатлари секинлашиши, ҳатто камайиб кетиши мумкин.Иқлимшунос Эркин Абдулаҳатов Ўзбекистонга хавф туғдира бошлаган сув танқислиги ва экин ерларининг тез шўрланиши ҳақида фикр билдириб, «аҳвол анчайин хароб» эканини айтиб ўтганди. Унинг қайд этишича, томчилатиб суғориш тизими кенг йўлга қўйилмас, сувни тежашга интилиш бўлмас экан, сув ва ер шўрланиши билан боғлиқ муаммолар кучайиб бораверади. Шунингдек, Эркин Абдулаҳатов «Дарё» мухбири билан суҳбатда ҳар йили иккита Тошкент майдонига тенг ҳудуд чўллашаётганини таъкидлаганди.
«Ўзсувтаъминот» бош мутахассиси Анвар Мухамедалиевнинг маълум қилишича, Ўзбекистонда сўнгги 15 йил ичида аҳоли жон бошига йиллик сув ҳажми 3048 метр кубдан 1589 метр кубгача камайган. Жаҳон банкининг таҳлилий кўрсаткичларига кўра, сувга бўлган талабнинг кучайиши ҳисобига 2050 йилга бориб Ўзбекистонда сув танқислиги беш баробарга ошади.
Мавзуга доир:
Изоҳ (0)