Солиқ кодексининг иккита моддасига ўзгартириш киритиш назарда тутилмоқда. Бу масала бугун, 6 декабрь куни бўлиб ўтган Олий Мажлис Қонунчилик палатаси ялпи мажлисида муҳокама қилинди.
Мажлисда камерал солиқ текшируви тартиби такомиллаштирилиши муносабати билан Солиқ кодексига ўзгартиш киритишга оид қонун лойиҳаси кўриб чиқилди. Мазкур ҳужжат билан Солиқ кодексининг 138-моддаси 22-қисмига ва 274-моддасининг 3-қисмига ўзгартириш киритиш назарда тутилмоқда.
Амалдаги Солиқ кодексининг 138-моддаси 22-қисмида қуйидагилар белгиланган:
Қўшилган қиймат солиғи суммаси ўрнини қоплашга нисбатан камерал солиқ текшируви солиқ тўловчи томонидан солиқ даври учун солиқ ҳисоботи тақдим этиш чоғида солиқ органлари қўшилган қиймат солиғининг салбий суммаси ўрнини қоплаш (қайтариш) тўғрисида хабардор қилинган кундан эътиборан олтмиш кун ичида солиқ органининг буйруғисиз, Ўзбекистон Республикаси Вазирлар Маҳкамаси томонидан белгиланган тартибда амалга оширилади. Қўшилган қиймат солиғи суммаси ўрнини қоплашга нисбатан камерал солиқ текшируви натижаларига кўра солиқ ҳисоботига ўзгартишлар киритиш ҳақидаги талабнома ёзиб берилмайди.Кодекснинг 274-моддаси 3-қисмида шундай дейилган:
Агар камерал солиқ текшируви натижаларига кўра, солиқ органи солиқ суммасининг ўрнини тўлиқ ёки қисман қоплаш тўғрисида қарор қабул қилса, мазкур солиқ суммаси солиқ тўловчига солиқ ҳисоботини тақдим этишда солиқ суммасини қайтариш ҳақида солиқ органлари хабардор қилинган санадан эътиборан олтмиш кундан кечиктирмай қайтарилади.Янги қонун лойиҳасида юқоридаги моддаларда кўрсатилган солиқнинг ўрнини қоплаш муддатини 60 кундан 30 кунгача қисқартириш белгиланмоқда.
Мажлисда Давлат Солиқ қўмитаси раиси Шерзод Кудбиев кодексга киритилаётган мазкур ўзгартириш тизимда рақамлаштириш ишлари самарали кечаётгани билан боғлиқлигини айтди.
Охирги 2-3 йил ичида солиқ маъмурчилигини шиддат билан рақамлаштиряпмиз. Бунинг натижасида солиқ тушумлари кескин ўсиб бормоқда. Бугунги кунда ҚҚСнинг 84 фоизи автоматлаштириб бўлинган. Жами 90 фоиз ҳисоботларимиз тўлиқ автоматлаштирилган тарзда шаклланади. Ҳозирда 70 фоиз аризаларни 7 кун ичида кўриб чиқяпмиз. Қолган қисмига 30-35 кун вақт кетяпти. Бу қонун қабул қилиниши орқали солиқ органлари ваколати қисқаради. Яъни ҚҚСни қайтариб беришда Солиқ органлари камерал солиқ текшируви ўтказади. Мана шу текширувни ўтказишга бизга 60 кун ваколат берилган. Шу 60 кунни 30 кунга қисқартириш назарда тутилмоқда, — деди қўмита раҳбари.Шерзод Кудбиевнинг айтишича, 2022 йилнинг ўтган 11 ойи давомида тадбиркорларга қарийб 18 триллион сўм ҚҚС қайтариб берилган. Мазкур сумманинг 70 фоизи 7 кун ичида қайтарилган.
Муҳокамалар якунида қонун лойиҳаси депутатлар томонидан қабул қилинди.
Изоҳ (0)