6 декабрь куни Тошкентда зўравонликка қарши курашни институционализация қилиш бўйича халқаро анжуман бўлиб ўтди. «Дарё» фотомухбири Мадина Нурман ушбу тадбирда қатнашиб, фотогалерея тайёрлади.
Тадбирда БМТ бош котибининг ўринбосари, БМТнинг Женевадаги ваколатхонаси бош директори Татяна Валовая, Президент администрацияси Ижро этувчи аппаратининг Коммуникациялар ва ахборот сиёсати бўйича шуъба мудири Саида Мирзиёева, Олий Мажлис Сенати раиси Танзила Норбоева, БМТ доимий координатори вазифасини бажарувчи ва ЮНИСЕФнинг Ўзбекистондаги ваколатхонаси раҳбари Мунир Мамедзаде, Европа Иттифоқининг Ўзбекистондаги ваколатхонаси раҳбари Шарлотта Адриан, тегишли давлат органлари ва нодавлат сектор вакиллари, халқаро ташкилотлар экспертлари, шунингдек, ОАВ вакиллари ва блогерлар иштирок этди.
Конференцияда гендер зўравонликка қарши курашиш бўйича идораларни самарали мувофиқлаштириш зарурати, хотин-қизлар ҳуқуқларини институционал ҳимоя қилишда хотин-қизлар масалалари бўйича тегишли қўмитанинг роли, ҳуқуқни муҳофаза қилиш органлари томонидан аёлларни ҳимоя қилиш механизмлари каби долзарб мавзулар кўтарилди ва муҳокама қилинди.
Татяна Валовая ўз нутқида «сўнгги ўн йилликлар давомида эришилган сезиларли ютуқларга қарамай, барқарор ривожланишнинг бешинчи мақсади — гендер тенглиги ҳамда аёллар ва қизларнинг имкониятларини кенгайтириш ҳали ҳам кундалик амалиётга татбиқ этилишдан узоқдадир. Бу соҳада жамоавий ҳаракатларимизни кучайтириш керак», — деб таъкидлади.
Ўзбекистоннинг гендер тенглиги, шунингдек, аёлларга нисбатан камситиш, тазйиқ ва зўравонликка барҳам бериш соҳасидаги масалаларни ҳал этишни фаоллаштириш борасидаги саъй-ҳаракатларини алоҳида таъкидламоқчиман. Сиёсий, иқтисодий, ижтимоий ва маданий соҳаларда муҳим ютуқларга эришилди. Миллий аёллар ҳаракати ва фуқаролик жамиятининг бирлашиши мамлакат ичида ва ундан ташқарида аёллар ва қизларнинг ҳуқуқ ва имкониятларини кучайтириш бўйича таъсирчан ташаббусларнинг амалга оширилишига ҳисса қўшди, — деб айтди Татяна Валовая.
Тадбирда аёллар оилавий зўравонликдан ўзни хавфсиз ҳис қилиши ва ўз салоҳиятини рўёбга чиқариши мумкин бўлган шелтерлар фаолияти каби муҳим институционал жиҳатга катта эътибор қаратилди.
Бундан ташқари, ОАВ фаолиятида аёллар ва эркаклар тенг ҳуқуқлилиги кафолатларини таъминлашга бағишланган муҳокамалар ҳам бўлиб ўтди.
Изоҳ (0)