Бугун, 6 декабрь куни Олий Мажлис Қонунчилик палатасида «Маъмурий суд ишларини юритиш тўғрисидаги кодексига ўзгартиш киритиш ҳақида»ги қонун лойиҳаси биринчи ўқишда кўриб чиқилди.
Статистикага кўра, маъмурий судлар томонидан 2021 йилда 15 мингдан ортиқ иш кўрилган. Шундан 5 минг 300 дан ортиқ арзиларни қаноатлантириш рад этилган. Шу аризаларнинг 883 таси шикоят қилиш муддати ўтгани сабабли рад этилган. 2022 йилнинг ўтган 8 ойида ҳам 867 та иш бўйича шундай асос билан аризани қаноатлантириш рад этилган. Бунда судлар томонидан қаноатлантириш рад этилган аризаларнинг ўртача 20 фоизи шикоят қилиш муддати ўтгани сабабли рад этилган.
Мажлисда Олий суд раиси ўринбосари Шуҳрат Полвонов қонун лойиҳаси ҳақида ахборот берди. Маълум қилинишича, давлат органи қарори ёки мансабдор шахс устидан судга шикоят қилиш муддатини узайтириш одил судловга эришиш учун муҳим аҳамиятга эга.
Бугунги кунда давлат органи қарори, мансабдор шахс устидан судга шикоят қилиш учун белгиланган муддатнинг қисқа экани фуқаро ва тадбиркорлик субъектларининг бузилган ҳуқуқларини тиклаш имконини бермаяпти. Шу сабабли, кенг жамоатчилик, хусусан, соҳада фаолият юритиб келаётган амалиётчи юристлар, ҳуқуқшунос блогерлар томонидан билдирилган таклиф ва мулоҳазалар, суд амаалиёти таҳлили натижаларидан келиб чиқиб, ушбу муддатни қайта кўриб чиқиш ва узайтириш зарурияти келиб чиқмоқда.Шуҳрат Полвоновнинг қўшимча қилишича, қонун лойиҳаси жамоатчилик муҳокамасидан ўтказилган ва давлат бюджетидан қўшимча харажатларни талаб этмайди.«Маъмурий суд ишларини юритиш тўғрисида»ги кодекснинг 186-моддасида давлат органининг қароридан ёки мансабдор шахслар қарори, ҳаракати ёки ҳаракатсизлиги устидан ариза ва шикоят мансабдор шахсга ўзининг ҳуқуқ ва эркинликлари, қонуний манфаатлари бузилгани тўғрисида маълум бўлган пайтдан бошлаб, 3 ой ичида судга берилиши мумкинлиги белгиланган. Бу эса одил судловга эришиш даражасини чеклаб, фуқаролар ва тадбиркорларнинг ҳақли эътирозларига сабаб бўлмоқда. Шу муносабат билан, аҳолидан келиб тушаётган таклифларни инобатга олиб, судга мурожаат қилишни янада эркинлаштириш, аҳолининг одил судловдан фойдаланишини кенгайтириш мақсадида «Маъмурий суд ишларини юритиш тўғрисида»ги кодексга маъмурий органнинг, фуқаролар ўзини ўзи бошқариш органининг, улар мансабдор шахсларининг қарори, ҳаракати (ҳаракатсизлиги) устидан судга шикоят қилишни 3 ойлик муддатини 6 ойга узатйиириш таклиф этилмоқда. Бу турли сабабларга кўра вақтида шикоят қила олмаган тарафларнинг суд қарори устидан шикоят қилиш имкониятини кенгайтиришга хизмат қилади.
Қонун лойиҳаси депутатлар томонидан биринчи ўқишда қабул қилинди.
Изоҳ (0)