Владимир Зеленский Financial Times томонидан «Йил одами» деб топилди
Британиянинг Financial Times нашри Украина президенти Владимир Зеленскийни «Йил одами» деб топди.
Нашр президентни «Украина халқининг Россия агрессиясига қарши курашдаги жасорати ва матонати тимсоли» деб эълон қилди.
«Украина президенти авторитаризмга қарши глобал курашда демократик дунёнинг флагмани бўлди, бу XXI асрнинг йўналишини белгилаб бериши мумкин», деб ёзади Financial Times.
Айнан шу сабабларга кўра нашр Украина раҳбарини «Йил одами» деб танлаган. Зеленский президентлик даврида кўплаб танқидларга учраган бўлса-да, уруш йилларида у ўзини яхши раҳбар сифатида кўрсатгани, жумладан, Украинанинг урушга қарши туришига ёрдам бергани, Ғарб давлатларини бу борада Украинага ёрдам кўрсатишга жалб қилгани қайд этилган.
Президент АҚШнинг эвакуация қилиш ҳақидаги таклифини қабул қилиш ўрнига Киевда қолгани «Украина армияси ва унинг халқини урушга қаршилик кўрсатишга ундаган энг муҳим дақиқалардан бири бўлгани» таъкидланади.
«Бу украиналиклар ва Ғарб иттифоқчилари учун кутилмаган жавоб бўлди, улар мамлакат сиёсий етакчисидан унчалик умид қилмаган», — дея таъкидлайди Financial Times.
Шу билан бирга, Зеленский нашрга Россия урушининг дастлабки кунлари ва Киевда қолиш қарори ҳақида гапирган.
«Мен жасоратлидан кўра кўпроқ жавобгарман. Чунки одамларга панд беришни хоҳламайман», — дейди у.
