Ўзбекистон ва Россия ҳукумати раҳбарлари ҳамкорликни янада ривожлантиришга қаратилган ўндан ортиқ ҳужжатни имзолади

Ўзбекистон ва Россия ҳукуматлари раҳбарлари икки давлат ўртасидаги ўзаро ҳамкорликни янада ривожлантиришга қаратилган ўндан ортиқ ҳужжатни имзолади. Бу ҳақда Инвестициялар ва ташқи савдо вазирлиги хабар берди.

2 декабрь куни Жамшид Хўжаев Самарқандда бўлиб ўтган Ўзбекистон ва Россия ҳукуматлари раҳбарлари даражасидаги қўшма комиссиянинг 3-мажлисида иштирок этган. Бош вазир Абдулла Арипов ва Россия ҳукумати раиси Михаил Мишустин раислигида ўтган йиғилишда мамлакатларимиз ўртасидаги стратегик шериклик ва ўзаро ҳамкорлик муносабатларининг бугунги ҳолати ва истиқболлари муҳокама этилган.

Мажлисда ҳукуматлар олдига турли соҳаларда амалий ҳамкорликни ҳар томонлама ривожлантириш вазифаси қўйилган. Истиқболли сармоявий лойиҳалар ва савдо шартномаларининг амалга оширилишини таъминлаш ҳамда маданий-гуманитар ҳамкорликни чуқурлаштириш режаларини келишиб олинди.

Қайд этилишича, сўнгги беш йилда Ўзбекистонда Россия сармояси иштирокидаги корхоналар сони уч баравар кўпайиб, қарийб уч мингтага етди. Биргина жорий йилда 700 та корхона ташкил этилди. Ўз навбатида Россияда ҳам ўзбек капитали иштирокида мингга яқин корхона фаолият юритмоқда.

Бугунги кунда давлатлар ўртасида қишлоқ хўжалиги, тўқимачилик ва озиқ-овқат саноати, фармацевтика, электротехника ва машинасозлик соҳаларида саноат кооперацияси ривожланмоқда.

Томонлар транспорт ва транзит соҳасидаги ҳамкорликни кенгайтиришдан манфаатдорлиги билдирди. Жорий йилда юк ташиш ҳажми 21 фоизга ошгани, бунда транзит юк ташишлар салмоғи 25 фоизга кўпайгани мамнуният билан қайд этилди. Шу билан бирга ҳудудлар орқали транзит юк ташишда ишончли транспорт-логистика занжирларини шакллантириш бўйича ҳамкорликни давом эттириш зарурлиги таъкидланди.

Таълим ва илм-фан, маданият соҳаларидаги ҳамкорлик икки томонлама муносабатларнинг муҳим йўналишларидан ҳисобланади. Айни пайтда Ўзбекистонда Россиядаги олий таълим муассасаларининг 14 та филиали фаолият юритмоқда.

Мажлис якунига кўра, ўзаро ҳамкорликни янада ривожлантиришга қаратилган ўндан ортиқ ҳужжат имзоланди.

Мавзуга доир: Мирзиёев ва Путин кенг қамровли стратегик шериклик тўғрисида декларация имзолади (фото)