Ташқи ишлар вазири Владимир Норов 2 декабрь куни ЕХҲТ ташқи ишлар вазирлари кенгаши йиғилишида сўзга чиқиб, минтақавий масалаларга алоҳида тўхталиб ўтди. Бу ҳақда ТИВ ахборот хизмати хабар берди.
Қайд этилишича, вазир бугунги кунда Марказий Осиё минтақасида мутлақо янги ўзаро ишончга асосланган муҳит шаклланганини таъкидлаган: кўплаб тўсиқлар бартараф этилди, фуқароларнинг эркин ҳаракатланиши учун шароитлар яратилди, ўзаро товар айирбошлаш ва инвестициялар ҳажмини ошириш, минтақавий ўзаро боғлиқлик, хавфсизлик ва барқарор ижтимоий-иқтисодий ривожланиш учун қулай муҳит шаклланди.
Жорий йилнинг июль ойида Қирғизистон Республикасида бўлиб ўтган Давлат раҳбарларининг тўртинчи маслаҳат учрашувида Марказий Осиёни XXI асрда ривожлантириш бўйича тарихий дўстлик, яхши қўшничилик ва ҳамкорлик шартномаси келишиб олинган.
Ўзбекистон делегацияси раҳбарининг таъкидлашича, Марказий Осиёда экологик муаммолар ҳамон долзарблигича қолмоқда. Минтақадаги иқлим ўзгаришининг суръати дунё бўйича ўртача кўрсаткичдан икки баравар кўп.
Норов ЕХҲТни Орол денгизи экологик ҳалокати оқибатларини юмшатиш, Оролбўйида долзарб ижтимоий-иқтисодий лойиҳа ва дастурларни амалга ошириш бўйича ҳаракатларда фаол иштирок этишга чақирган.
Изоҳ (0)