Tashqi ishlar vaziri Vladimir Norov 2-dekabr kuni YXHT tashqi ishlar vazirlari kengashi yig‘ilishida so‘zga chiqib, mintaqaviy masalalarga alohida to‘xtalib o‘tdi. Bu haqda TIV axborot xizmati xabar berdi.
Qayd etilishicha, vazir bugungi kunda Markaziy Osiyo mintaqasida mutlaqo yangi o‘zaro ishonchga asoslangan muhit shakllanganini ta’kidlagan: ko‘plab to‘siqlar bartaraf etildi, fuqarolarning erkin harakatlanishi uchun sharoitlar yaratildi, o‘zaro tovar ayirboshlash va investitsiyalar hajmini oshirish, mintaqaviy o‘zaro bog‘liqlik, xavfsizlik va barqaror ijtimoiy-iqtisodiy rivojlanish uchun qulay muhit shakllandi.
Joriy yilning iyul oyida Qirg‘iziston Respublikasida bo‘lib o‘tgan Davlat rahbarlarining to‘rtinchi maslahat uchrashuvida Markaziy Osiyoni XXI asrda rivojlantirish bo‘yicha tarixiy do‘stlik, yaxshi qo‘shnichilik va hamkorlik shartnomasi kelishib olingan.
O‘zbekiston delegatsiyasi rahbarining ta’kidlashicha, Markaziy Osiyoda ekologik muammolar hamon dolzarbligicha qolmoqda. Mintaqadagi iqlim o‘zgarishining sur’ati dunyo bo‘yicha o‘rtacha ko‘rsatkichdan ikki baravar ko‘p.
Norov YXHTni Orol dengizi ekologik halokati oqibatlarini yumshatish, Orolbo‘yida dolzarb ijtimoiy-iqtisodiy loyiha va dasturlarni amalga oshirish bo‘yicha harakatlarda faol ishtirok etishga chaqirgan.
Izoh (0)