Тошкент шаҳри Олмазор туманида хизмат вазифасини бажараётган профилактика инспектори Н.Бобомуротов ўлдириб кетилганди. Ички ишлар вазирлиги матбуот хизмати ҳолатга аниқлик киритди.

Жиноятни ўрганиш жараёнида аниқланишича, марҳум профилактика инспектори жабрланувчи аёлнинг чақирувига асосан воқеа жойига борган. Аёл ўзининг шаръий никоҳидаги турмуш ўртоғи ўлдириш билан қўрқитаётганини ва унга чора кўришни сўраган.

Профилактика инспектори хабарни расмийлаштириш мақсадида жабрланувчини ўз автомашинасида маҳалла идорасида жойлашган таянч пунктга олиб келганда, ортидан шахсий транспортида етиб келган Б.З. профилактика инспекторига ўзи билан олиб келган ошхона пичоғи билан ҳужум қилиб, жонига қасд қилган. Бу вақтда аёл қочишга улгурган.

«Профилактика инспектори ўз ҳаётини қурбон қилиш эвазига аёлнинг ҳаётини сақлаб қолган. Баён этилган ҳолат тегишли видеотасвирларда ва гувоҳларнинг кўрсатмаларида акс этган.

Тергов якунланмагунга қадар жамоатчилик ва ОАВдан турли тахмин ва миш-мишлардан иборат, шахсларнинг шаъни ва қадр-қиммати камситилишига олиб келадиган ахборотни тарқатмасликларини сўраймиз», — дейилади хабарда.

Маълумот учун, олиб борилган тезкор-қидирув тадбирлари натижасида ИИБ профилактика инспектори ҳаётига тажовуз қилган фуқаро қўлга олиниб, процессуал тартибда чора кўриш учун прокуратура органларига топширилган.