Ижтимоий тармоқларда йўл-транспорт ҳодисасида вафот этган йигитнинг онаси йўллаган мурожаат тарқалиб, турли муҳокамаларга сабаб бўлмоқда. Мазкур ҳолат юзасидан Тошкент шаҳар ички ишлар бош бошқармаси муносабат билдирди.
Аниқланишича, 2021 йилнинг 25 август куни 1971 йилда туғилган Б.С. ўзининг бошқарувидаги Nexia-3 автомобилида Мирзо Улуғбек тумани Темур Малик 2-даражали кўчаси бўйлаб ҳаракатланган. Шу вақтда йўлнинг белгиланмаган қисмидан чиқиб келган пиёда — 1997 йилда туғилган V.Л.ни уриб юборган. Оқибатда пиёда воқеа жойида ҳалок бўлган.
Мазкур ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган. Тергов жараёнида барча зарурий тергов ҳаракатлари ўтказилган. Жумладан, судга оид автотехник экспертиза тайинланган, 2021 йил 15 ноябрь кунидаги хулосасига кўра, ушбу йўл-транспорт ҳодисаси вазиятида Nexia-3 ҳайдовчиси ўз вақтида кескин тормоз бериш йўли билан ҳодисанинг олдини олиш учун техник имкониятга эга бўлмаган.
Тергов жараёнида ҳайдовчи Б.С.нинг ҳаракатларида жиноят аломатлари аниқланмагани сабабли жиноят иши Жиноят процессуал кодексининг 83-моддаси 2-банди (реабилитация учун асослар, унинг қилмишида жиноят таркиби бўлмаса)га асосан жиноят иши ҳаракатдан тугатилган.
Шунингдек, қарордан норози бўлган тарафлар юқори турувчи органларга мурожаат қилиши мумкинлиги тушунтирилган.
Маълумот учун, мурожаатда аёл ўғлининг вафоти бости-бости қилингани, терговчилар одам уриб юборган шахсни қўллаб-қувватлаб, ишни ёпишга ҳаракат қилаётганини билдирган эди.
Изоҳ (0)