Бухоро вилояти судида Қорақалпоғистон Республикаси судининг Жиноят ишлари бўйича судлов ҳайъати 2022 йилнинг 1—2 июль кунлари Нукусда содир бўлган тартибсизликларда қатнашганликда гумонланган 22 кишига нисбатан қўзғатилган жиноят ишини кўриб чиқишни бошлади.
Дастлабки тергов органининг айблов хулосасига кўра, судланувчилар — Д.Тажимуратов, Л.Каллиханова, А.Турданов, А. Сметуллаев, Д.Джиемуратов, Б.Кадирбергенов, Б.Сейтниязов, А. Тоқимбетов, Қ.Сейтимов, А.Нуратдинов, С.Медетов, Н.Найипов, П.Шамшетов, Р.Бекмуратов, С.Каипов, Б.Генжебаев, С.Калилаев, П. Нурниязов, С.Калимов, Н.Султамуратов, А.Темирханов, А. Адилбеков Жиноят кодексининг 11 та моддаси бўйича айбланмоқда.
Жумладан, уларга 28-модда (жиноят иштирокчиларининг турлари моддаси орқали) 104-модда (қасддан баданга оғир шикаст етказиш) 159-модда (Ўзбекистон Республикасининг конституциявий тузумига тажовуз қилиш) 164-модда (босқинчилик) 167-модда (ўзлаштириш ёки растрата йўли билан талон-торож қилиш) 227-модда (ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) 243-модда (жиноий фаолиятдан олинган даромадларни легаллаштириш) 244-модда (оммавий тартибсизликлар) 244−1-модда (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 247-модда (ўқотар қуролни, ўқ-дориларни, ўқотар қуролнинг асосий қисмларини, портловчи моддаларни, портлатиш воситаларини ёки портлатиш қурилмаларини қонунга хилоф равишда эгаллаш) 277-модда (безорилик)лар билан айблов қўйилган.
Мазкур иш бўйича 20 нафар судланувчига нисбатан қамоққа олиш, бир нафарига уй қамоғи яна бир нафарига жамоа кафиллиги тарзидаги эҳтиёт чоралари қўлланган.
Суд жараёни очиқ тарзда бўлиб, оммавий ахборот воситалари вакиллари ва блогерлар учун суд мажлисларини видеоконференцалоқа воситасида тўғридан-тўғри кузатишга мўлжалланган ҳамда барча техник шароитлар яратилган матбуот зали ташкил этилган.
Суд давом этмоқда.
Изоҳ (0)