“Qozog‘iston barcha davlatlarning hududiy yaxlitligini qat’iy qo‘llab-quvvatlaydi” — To‘qayev

Qozog‘iston barcha davlatlarning hududiy yaxlitligini qat’iy qo‘llab-quvvatlaydi va ushbu tamoyilga ustuvor ahamiyat beradi. Bu haqda mamlakat prezidenti Qosim-Jo‘mart To‘qayev Samarqandda o‘tkazilayotgan Turkiy davlatlar tashkiloti rahbarlari sammitida aytib o‘tdi.

“Qozog‘iston barcha davlatlarning hududiy yaxlitligini qat’iy qo‘llab-quvvatlaydi, shuningdek, Birlashgan Millatlar Tashkiloti Nizomiga qat’iy rioya etish zarur deb hisoblaydi”, — dedi To‘qayev.

26-sentabr kuni Qozog‘iston Tashqi ishlar vazirligi rasmiy vakili Aybek Smadiyarov Ukrainaning Zaporojye va Xerson viloyatlari hamda Donbass hududlarini Rossiya Federatsiyasiga qo‘shib olinishi masalasida Qozog‘iston mamlakatlarning hududiy yaxlitligi tamoyillaridan kelib chiqib munosabat bildirishini aytgandi. 30-sentabr kuni Vladimir Putin ushbu hududlarni Rossiya tarkibiga kiritish to‘g‘risidagi farmonni imzolagan.

Iyun oyida esa Sankt-Peterburg xalqaro iqtisodiy forumida To‘qayev Putinning yonida Donetsk va Lugansk xalq respublikalarini (Donbass) kvazi-davlat (ma’lum bir mintaqaga da’vogarlik qiladigan va u yerda qandaydir hududiy nazoratni amalga oshiradigan, lekin davlatchilikning ba’zi mezonlariga ega bo‘lmagan jangari separatistik guruh) hududlari deb atagan va Qozog‘iston ularning mustaqilligini tan olmasligini aytgan.

Oktabr oyi boshida Qozog‘iston BMT Bosh Assambleyasining Donetsk va Lugansk xalq respublikalari, shuningdek, Xerson va Zaporojye viloyatlarini Rossiya tarkibiga qo‘shish bo‘yicha referendumlarni qoralovchi rezolyutsiyasiga ovoz berishda betaraf qoldi.

Bugun, 11-noyabr kuni Samarqand shahrida Turkiy davlatlar tashkilotining sammiti bo‘lib o‘tmoqda. Tashkilot tarkibiga Ozarbayjon, Qozog‘iston, Qirg‘iziston, Turkiya va O‘zbekiston kiradi.