23 ноябрга ўтар кечаси Запорожье вилоятининг Украина назоратидаги Волнянск шаҳрида маҳаллий шифохонанинг туғуруқ бўлими Россия томонидан ўққа тутилди. Оқибатда чақалоқ ҳалок бўлди. Бу ҳақда Запорожье вилояти маъмурияти раҳбари Александр Старух маълум қилди.
«Қалбимизни қайғу эгаллаб олди – эндигина дунёга келган гўдак ҳалок бўлди», — деб ёзган вилоят раҳбари Telegram-каналида.
Украина фавқулодда вазиятлар давлат хизматининг аниқлик киритишича, ҳужум вақтида аёл ва унинг янги туғилган боласи, шунингдек, шифокор туғуруқхонада бўлган. Қутқарувчилар шифокор ва аёлни вайроналар остидан тирик ҳолда олиб чиққан.
Ўққа тутилган жойда қидирув-қутқарув ишлари давом этмоқда.
Запорожье вилоятининг Украина назоратидаги қисмида жойлашган Волнянск ўтган ҳафтада камида икки марта ўққа тутилди. 17 ноябрь куни берилган зарбалар вақтида ракеталардан бири икки қаватли турар жой биносини вайрон қилган. Сўнгги маълумотларга кўра, 10 киши, жумладан, уч нафар бола ҳалок бўлган.
Изоҳ (0)