23-noyabrga o‘tar kechasi Zaporojye viloyatining Ukraina nazoratidagi Volnyansk shahrida mahalliy shifoxonaning tug‘uruq bo‘limi Rossiya tomonidan o‘qqa tutildi. Oqibatda chaqaloq halok bo‘ldi. Bu haqda Zaporojye viloyati ma’muriyati rahbari Aleksandr Starux ma’lum qildi.
“Qalbimizni qayg‘u egallab oldi – endigina dunyoga kelgan go‘dak halok bo‘ldi”, — deb yozgan viloyat rahbari Telegram-kanalida.
Ukraina favqulodda vaziyatlar davlat xizmatining aniqlik kiritishicha, hujum vaqtida ayol va uning yangi tug‘ilgan bolasi, shuningdek, shifokor tug‘uruqxonada bo‘lgan. Qutqaruvchilar shifokor va ayolni vayronalar ostidan tirik holda olib chiqqan.
O‘qqa tutilgan joyda qidiruv-qutqaruv ishlari davom etmoqda.
Zaporojye viloyatining Ukraina nazoratidagi qismida joylashgan Volnyansk o‘tgan haftada kamida ikki marta o‘qqa tutildi. 17-noyabr kuni berilgan zarbalar vaqtida raketalardan biri ikki qavatli turar joy binosini vayron qilgan. So‘nggi ma’lumotlarga ko‘ra, 10 kishi, jumladan, uch nafar bola halok bo‘lgan.
Izoh (0)