Ўзбекистон Марказий банки октябрь ойида 8,7 тонна олтин сотиб олган. Бу ҳақда таҳлилчиларга таяниб, Kitco хабар бермоқда.
Ўзбекистон йил бошидан бери 37 тонна олтин сотиб олган. Мамлакатнинг жами олтин захиралари 399 тоннага етган.
Шунингдек, ўтган ойда Туркия Марказий банки ҳам 9 тонна олтин сотиб олиб, 2022 йилда харид қилинган олтин миқодорини 103 тоннага етказди. Туркиянинг расмий захираларида жами 498 тонна олтин бор.
2022 йилнинг учинчи чорагида жаҳон марказий банклари 399,3 тонна олтин сотиб олган эди.
Учинчи чоракдаги кўрсаткич ўтган чоракка нисбатан 115 фоизга кўпдир. Бу марказий банклар томонидан 2000 йилдан бери энг йирик чораклик қимматбаҳо метал хариди бўлди.
Июль—сентябрь ойларида Туркия 31 тонна олтин сотиб олиб бу борада етакчи бўлган бўлса, Ўзбекистон 26 тонна олтин сотиб олган ҳолда иккинчи бўлган.
Жаҳон олтин кенгаши маълумотларига кўра, хабар қилинган харидлар билан бир қаторда, яширин харидлар ҳақида ҳам ҳисоб-китоблар мавжуд. Бозор таҳлилчилари Хитойни аноним тарзда олтин сотиб олаётганини таъкидламоқда.
Хитой Россиядан катта миқдорда олтин сотиб олган бўлиши мумкин, — деди бозор таҳлилчиси ва Жаҳон олтин кенгашининг япониялик собиқ директори Ицуо Тошима.
Тошиманинг таъкидлашича, бу 2009 йилдан 2015 йилгача олтин харидлари ҳақида хабар бермаган Хитой Халқ банки учун одатий ҳолдир. Ўшанда мамлакат олтин захираларини 600 тоннага оширганини очиқлаганди.
Изоҳ (0)