Тошкентда ичимлик суви ва канализация тизимини трансформация қилиш учун 218 миллион евро ажратилади. Бу ҳақда Норма хабар берди.
Маълум қилинишича, «Тошкентда ичимлик суви ва канализация тизимини трансформация қилиш» лойиҳасини амалга ошириш чора-тадбирлари тўғрисидаги президент қарори қабул қилинди.
2020 йилнинг мартида Франциянинг Suez International компанияси, Тошкент шаҳар ҳокимлиги, ЦСТ (аввалги Сувсоз) ва Уй-жой коммунал хизмат кўрсатиш вазирлиги ўртасида «Тошкентда сув таъминоти трансформацияси режаси» лойиҳасини амалга ошириш доирасида биргаликда бошқарув тўғрисидаги келишув имзоланган.
Ҳужжатга кўра, лойиҳанинг умумий қиймати 218 миллион евродан ортиқ бўлиб, шундан 154,5 миллион евро Франция ғазначилиги ва Европа банкларининг кредит маблағлари ҳисобидан, 64,3 миллион евро Ўзбекистон томонидан ажратилади.
Ушбу лойиҳани амалга оширишдан кутилаётган асосий кўрсаткичлар ҳам тасдиқланган:
- истеъмолчилар (жисмоний шахслар) учун сувни назорат қилиш ва ҳисобга олиш учун масофавий маълумотларни узатувчи 673 минг дона «ақлли» сув ҳисоблагичларини ўрнатиш;
- ичимлик суви таъминоти тизимида сув йўқотишларини 12 фоизга камайтириш;
- ичимлик суви таъминоти ва канализация тизимларининг бош режаларини ишлаб чиқиш.
Мавзуга доир: Ўзбекистонда сувдан фойдаланишдаги ҳуқуқбузарликлар бўйича маълумот берилди
Изоҳ (0)