Шавкат Мирзиёевнинг Парижга амалга оширган расмий ташрифи якунлари бўйича Ўзбекистон ва Франция президентлари қўшма баёноти қабул қилинди.
Икки мамлакат ўртасидаги юксак даражадаги кенг қамровли шерикликни ривожлантиришни қўллаб-қувватлаш мақсадида қабул қилинган баёнотда икки томонлама сиёсий, иқтисодий муносабатлар, минтақавий ва халқаро сиёсат масалалари ўрин олган.
Давлат раҳбарлари икки томонлама шерикликни чуқурлаштиришга ҳисса қўшиш учун Ўзбекистон томонидан бошланган мамлакатни модернизация қилиш бўйича ислоҳотлар ҳамда Марказий Осиёда яхши қўшничилик муносабатларини ривожлантириш йўлида олиб борилаётган саъй-ҳаракатлар юзага чиқарган ижобий истиқболларга урғу берган.
Ташриф давомида томонлар таълим, илм-фан, маданий мерос, фуқаро авиацияси, давлат хизмати ва коррупцияга қарши кураш бўйича ҳамкорлик юзасидан 13 та келишувларни имзолади.
Президентлар турли даражаларда, зарур ҳолатларда, тегишли вазирликларни жалб қилган ҳолда, ўзаро манфаатли масалалар юзасидан, хусусан, хавфсизлик ва иқтисодий йўналишлар бўйича сиёсий маслаҳатлашувлар ўтказишга тайёр эканликларини билдирди.
Маданият ва маданий мерос соҳаларида ҳамкорликни кучайтиришга тайёр эканликлари, Тошкентда Франция—Ўзбекистон маданият марказини ташкил этиш бўйича ишлар давом эттирилиши тасдиқланди.
Таълим соҳасида томонлар таълим муассасалари ўртасидаги муносабатларни кучайтириш, шунингдек, француз тилини ўқитиш ва ўқитувчиларни тайёрлашни такомиллаштириш орқали ҳамкорликни янада ривожлантиришга келишиб олди. Шунингдек, Парижда 27–28 ноябрь кунлари бўлиб ўтадиган иккинчи Ўзбекистон ва Франция университетлари форуми ташкил этилишидан мамнун эканликларини билдирди.
Иқтисодий йўналиш бўйича президентлар Ўзбекистон ва Франция ўртасидаги иқтисодий ҳамкорлик юзасидан 2020—2030 йилларга мўлжалланган йўл харитасида қайд этилган соҳалар бўйича ҳамкорликни ривожлантиришга келишиб олди.
Туризм соҳасида, хусусан, туристик ҳудудлар салоҳиятини ишга солиш бўйича ҳамкорликни янада ривожлантиришга келишилди. Франция томони Ўзбекистоннинг 2023 йилда Хива шаҳрида «Европа Иттифоқи – Марказий Осиё» биринчи туристик форумини ўтказиш бўйича таклифини қўллаб-қувватлади.
Ўзбекистон ва Франция халқаро ва минтақавий даражада хавфсизлик, тинчлик ва барқарорликни мустаҳкамлашга ҳисса қўшиш истакларини тасдиқлади. Иккала томон БМТ, Европада хавфсизлик ва ҳамкорлик ташкилоти, бошқа халқаро ташкилотлар ва тегишли минтақавий тузилмалар доирасида ўз ҳаракатларини мувофиқлаштиришни кучайтиришга тайёр эканликларини билдирди.
Мавзуга доир:
Изоҳ (0)