Тошкентнинг Мирзо Улуғбек туманидаги IT парк биносида 23 ноябрь куни ёнғин юз берди. Бу ҳақда ФВВ матбуот хизмати хабар қилди.
Қайд этилишича, соат 11:12 да Шаҳриобод кўчасида жойлашган кўп қаватли биноларнинг бирида ёнғин содир бўлаётгани тўғрисида шаҳар ФВБга хабар келиб тушган. Шунга кўра 3 та ёнғин-қутқарув экипажи соат 11:15 да воқеа жойига етиб борган ва ёнғин соат 11:25 да ўчирилган.
Ёнғин натижасида 24 қаватли қурилиши тугалланмаган IT парк биносининг 21-қаватида тахминан 5 квадрат метр майдонда пенопласт қолдиқлари ёниб зарарланган. Ёнғин натижасида қўшни биноларга зарар етмаган.
Ҳодиса оқибатида тан жароҳати олган ва ҳалок бўлганлар йўқ.
Ҳозирда ёнғиннинг келиб чиқиш сабаби ва моддий зарар миқдори аниқланмоқда.
Изоҳ (0)