Тошкент шаҳри ва вилоятида кредит маблағлари эвазига харид қилинган қорамол ва металлни талон-торож қилиш ҳолати аниқланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Оққўрғон туман бўлими томонидан терговга қадар текширув ўтказилган. Унда Т.ч. МЧЖ раҳбари Х.Й. ва бошқалар ҳудудий тижорат банки филиалидан ажратилган кредит маблағи эвазига харид қилинган қорамолларни гўёки «Ж-Р.» фермер хўжалигига сотилгани ҳақида сохта ҳужжатларни расмийлаштириб, 100 бош қорамолни нақд пулга сотиб юборгани аниқланган. Улар жами 2,3 миллиард сўм кредит маблағини ўзлаштириш йўли билан талон-торож қилган.
Шунингдек, департаментнинг Тошкент шаҳар бошқармаси томонидан терговга қадар текширув ўтказилган. Унда А.С. МЧЖ раҳбари Й.Т. банк филиалидан ажратилган 2,1 миллиард кредит маблағи эвазига харид қилинган металл маҳсулотларини нақд пулга сотиб юборгани аниқланган. Шунингдек, маблағни қайтармаслик мақсадида гаровга қўйилган омборхона биносини тақиқдан ечиш тўғрисида банкнинг хати ва муҳрини қалбакилаштириб, омборхонага қўйилган тақиқни бекор қилишга эришган.
Ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 207-моддаси (мансабга совуққонлик билан қараш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)