Украинанинг «Укртранснафта» давлат компанияси «Транснефть»ни Россия нефтини Венгрия, Чехия ва Словакияга кетадиган «Дружба» нефть қувурининг жанубий тармоғи орқали етказиб бериш учун тарифни ошириш нияти ҳақида огоҳлантирди. Бу ҳақда Bloomberg хабар берди.
Компания Киев ставкани 1 тонна учун 13,6 еврогача оширмоқчилигини маълум қилган. Бу жорий кўрсаткичдан 18,2 фоизга, йил бошидаги нархдан 58,1 фоизга юқоридир.
«Транснефть» президентининг маслаҳатчиси Игорь Деминнинг таъкидлашича, компания Россиянинг тегишли вазирликлари ва ўз тизимига нефть етказиб берувчи компаниялари билан маслаҳат ўтказиш ниятида. Йил охиригача қарор қабул қилинади, дея тушунтирди у.
Аввалроқ «Укртранснафта» Россия ҳарбий махсус операцияси чоғида нефтни ташиш инфратузилмасини қисман йўқ қилиш ҳисобига тарифни ошириш зарурлигини таъкидлаган эди.
Бу сафар энергетика инфратузилмасининг қисман вайрон бўлиши, эҳтиёт қисмларнинг етишмаслиги, шунингдек, ҳарбий ҳаракатлар шароитида ходимларнинг хавфсиз меҳнатини ташкил этиш харажатларининг ошишига олиб келгани айтилмоқда.
Ноябрь ойи ўрталарида Украина Венгрия йўналиши бўйича «Дружба» орқали нефтни юборишни тўхтатиб, буни Россия ракеталари ҳужуми натижасида трансформатор станциясига зарар етказилиши ва электр тармоғидаги кучланишнинг пасайиши билан изоҳлади. 16 ноябрь куни етказиб бериш қайта тикланди.
Украина орқали «Дружба»нинг жанубий тармоғи бўйлаб ойига 1—1,5 миллион тонна нефть етказиб берилади. Ўтган йили транзит 12 миллион тоннани ташкил этган, шундан 5,2 миллион тоннани Словакия, 3,4 миллион тоннани Чехия ва Венгрия қабул қилиб олган.
Изоҳ (0)