2022 йилнинг январь—октябрь ойлари якунлари бўйича Ўзбекистоннинг ташқи савдо айланмаси 40,1 млрд долларга етиб, 2021 йилнинг шу даврига нисбатан 7,3 млрд долларга ёки 22,2 фоизга ўсди. Бу ҳақда Давлат статистика қўмитаси матбуот хизмати хабар бермоқда.
Ҳисобот даврида -9,1 млрд доллар қийматида пассив ташқи савдо баланси қайд этилди.
Мамлакатнинг ташқи савдо фаолияти бўйича энг йирик 20 та ҳамкорлари орасида 3 та мамлакат билан савдода ижобий салдо кузатилмоқда.
Афғонистон, Қирғизистон, Тожикистон каби давлатлар билан фаол ташқи савдо баланси мавжуд. Қолган 17 мамлакатлар билан ташқи савдо айланмасининг пассив баланси сақланиб қолмоқда.
Бугунги кунда Ўзбекистон дунёнинг 196 та давлати билан савдо муносабатлари ўрнатган. Ташқи савдо айланмасининг энг катта ҳажми Хитой (18,7 фоиз), Россия (18,6 фоиз), Қозоғистон (9,3 фоиз), Туркия (6,7 фоиз), Жанубий Корея (4,9 фоиз), Қирғизистон (2,5 фоиз) ва Германия (2,2 фоиз) ҳиссасига тўғри келмоқда.
Давлатлар гуруҳлари бўйича ташқи савдонинг энг катта ҳажми МДҲ мамлакатларига — 15,9 млрд доллар, шундан ЁИИ мамлакатларига — 14,3 млрд доллар, Европа Иттифоқи мамлакатлари билан товар айирбошлаш 3,5 млрд доллар ва бошқа давлатлар билан — 24,2 млрд долларни ташкил этди.
Мамлакат ташқи савдо айланмаси таркибида энг салмоқли улуш Тошкент шаҳрига тўғри келди, унинг ҳиссаси 39,1 фоиз ёки 15,7 млрд долларни, энг кам улуш эса 0,8 фоиз ёки 319,7 млн доллар даражасида Сурхондарё вилоятида қайд этилди.
Ташқи савдо умумий ҳажмида экспорт улуши 15,5 млрд долларни (2021 йил январь—сентябр ойларида ўсиш 23,8 фоиз), импорт 24,6 млрд долларни (ўсиш 21,2 фоиз) ташкил этди.
Изоҳ (0)