Тошкент шаҳрининг Сергели туманида қурилаётган кўп қаватли турар жойлардан бирида кран қулаб тушганди. Саноат хавфсизлиги давлат қўмитаси ушбу кранни эксплуатация қилиш учун тегишли рухсат олинмаганини маълум қилди.
Қўмитас мутахассислари мазкур ҳолат бўйича жойга чиққан ҳолда тезкор ўрганиш ўтказган. Ўрганиш натижасида аниқланишича, Omega agro srtoy МЧЖ қурилиш ташкилоти қурилиш объектида «Якка тартибдаги тадбиркор Нажимов Рашид»га тегишли КБ-411.04 минора крани 1998 йил ишлаб чиқарилган бўлиб, ижара шартномаси асосида Omega agro srtoy МЧЖ қурилиш объектида ишлатиб келинмоқда.
19 ноябрь куни соат 09:00 ларда қурилиш майдончасида ишчилар минорали краннинг рельс йўли кўчаётганини кўрган. Авария ва бахтсиз ҳодисанинг олдини олиш мақсадида юк кўтариш крани ўқи (стреласи) пастга туширилиб демонтаж ишлари бошланган. Автокран ёрдамида КБ-411.04 минорали кранни махсус юк кўтаргичлар билан кўтариш бошланган пайтда рельс йўли чўкиб минорали кран йиқилган.
Қурилиш мутасаддилари томонидан минорали кранга тегишли ҳужжатлар Бухоро вилоятидан келтирилиши лозимлиги сабаб қилиниб, қўмита ходимларига тақдим этилмаган. Кранни эксплуатация қилиш учун Саноат хавфсизлиги давлат қўмитасидан тегишли рухсат олинмаган.
Хабарда айтилишича, ушбу ҳодиса юзасидан Саноат хавфсизлиги давлат қўмитаси томонидан тегишли ўрганиш ўтказилмоқда.
Изоҳ (0)