19 ноябрь куни Душанбеда Тожикистон Дзюдо федерациясининг ҳисобот-сайлов мажлиси бўлиб ўтди. Кун тартибидаги масалалардан бири ушбу спорт ташкилотининг янги раҳбариятини сайлашдан иборат бўлди, деб ёзади Asia Plus.
Мажлис иштирокчилари федерация раҳбарлигига энг муносиб номзод сифатида Исмоил Маҳмадзоирни илгари сурди.
Исмоил Маҳмадзоир 1996 йилда туғилган, у Тожикистон президенти Эмомали Раҳмоннинг тўнғич невараси. У ёшлигидан спорт билан шуғулланади, севимли спорт турлари орасида дзюдо, футбол, от спорти ва бошқалар бор.
Исмоил Маҳмадзоир президентнинг катта қизи Фируза Раҳмонова ва Маҳмадзоир Соибовнинг ўғлидир.
Сўнгги йилларда «Ҳожи Шариф» спорт клубига ҳомийлик қилмоқда. Унда юзлаб истиқболли спортчилар шуғулланди. Клуб 2019 йил сентябрида очилган.
Клубни яратишдан мақсад халқаро майдонда Тожикистонга муносиб вакиллик қила оладиган профессионал спортчиларни тайёрлашдан иборат бўлган.
Ушбу клубнинг энг яхши спортчиларидан бири Сомон Маҳмадбеков ёшлар орасида дзюдо бўйича жаҳон чемпионига айланди.
«Ҳожи Шариф» клубининг барча спортчилари халқаро даражада ҳаммаси бўлиб 171 та медални қўлга киритган (47 та олтин, 30 та кумуш ва 94 та бронза).
Тожикистон раҳбари Эмомали Раҳмоннинг ўзи мамлакат Миллий олимпия қўмитаси президенти ҳисобланади. 2021 йил декабрида у тўртинчи марта бу лавозимга сайланганди.
2019 йилда эса Эмомали Раҳмоннинг кичик ўғли, 21 ёшли Сомон Эмомали мамлакатнинг «Талко Кабел» алюминий компанияси бош директорининг ўринбосари лавозимига тайинлангани хабар берилганди.
Эмомали Раҳмон тўққиз фарзанднинг отаси, унинг еттита қизи, иккита ўғли бор. Тожикистон президентининг болалари мамлакатда юқори лавозимларда ишлайди. Иккинчи қизи Озода Раҳмон президент девонини бошқаради, катта ўғли Рустам Эмомали Душанбе шаҳрининг мери. Тўртинчи қизи Руҳшона Раҳмонова Ташқи ишлар вазирлигида бўлим бошлиғи, олтинчи қизи Зарина Раҳмон Тожикистоннинг энг йирик банкларидан бўлган «Ориёнбанк» раисининг ўринбосари лавозимида фаолият олиб боради.
Изоҳ (0)