Ўзбекистонда сўм 2022 йилнинг октябрь ойида ўтган ойга нисбатан ўсувчи динамика қайд этиб, 0,7 фоизга мустаҳкамланди. Бу ҳақда Марказий банк хабар бермоқда (пдф).
Ўзбек сўми 2021 йил мос даврига нисбатан 3,5 фоизга, базавий давр — 2019 йилнинг сентябрига нисбатан эса 7,8 фоизга мустаҳкамланди.
Октябрда Ўзбекистон сўмининг қадри ошиши асосан савдо-ҳамкор давлатлар валюта курсларининг юқори суръатларда қадрсизланиши ҳамда ички инфляция таъсири билан изоҳланади.
Мазкур индексни оширувчи омиллар бўлиб:
- савдо-ҳамкор давлатларнинг валюта курслари ўзгариши – 1,5 фоиз банд;
- ички инфляция — 1,2 фоиз банд хизмат қилган.
Пасайтирувчи омиллар бўлиб;
- савдо-ҳамкор давлатлар инфляцияси – 0,9 фоиз банд;
- миллий валюта курсининг ўзгариши — 1,1 фоиз банд ҳисса қўшди.
Асосий савдо-ҳамкор давлатларнинг валюта курслари октябрь ойида АҚШ долларига нисбатан қуйидагича динамика кўрсатди:
Россия рубли ушбу ойида 3 фоизга қадрсизланди (1 АҚШ доллари 60 рублдан 61,8 рублга). Бунда Россия иқтисодиётига нисбатан қўлланилиши кутилаётган навбатдаги санкциялар таъсир кўрсатди.
Қозоғистон тенгеси октябрь ойида 0,7 фоизга мустаҳкамланди (1 АҚШ доллари 475,7 тенгедан 472,4 тенгега). Қисқа муддатли даврда тенге курсининг тебранувчанлиги жахон хом ашё бозорларидаги ҳолатга ҳамда геосиёсий вазиятга боғлиқ бўлади.
Октябрь ойида турк лираси 1,5 фоизга қадрсизланди (1 АҚШ доллари 18,3 лирадан 18,6 лирага). Инфляциянинг юқори суръатларда тезлашишига қарамасдан Туркия марказий банкининг юмшоқ пул-кредит сиёсати олиб бораётганлиги лира курсининг қадрсизланишига сабаб бўлди.
Хитой юани курси мазкур ойда 2,5 фоизга қадрсизланди (1 АҚШ доллари 7 юандан 7,2 юанга). АҚШ Федерал резерв тизими томонидан асосий ставканинг кетма-кет кўтарилиши, доллар индексининг юқорилаши юань курсига салбий босим кўрсатди.
Изоҳ (0)