Ўзбекистонда муомаладаги нақд пул миқдори камайди

Ўзбекистонда октябрь ойида муомаладаги нақд пул миқдори 43,778 трлн сўмни ташкил қилди. Бу ҳақда «Дарё»га Марказий банк ҳисоботидан маълум бўлди.

Муомалага чиқарилган нақд пуллар май ойида 3,7 трлн сўмга кўпайган бўлса, июнь ойида бу кўрсаткич 3,6 трлн сўм бўлган эди. 

Июль ойида нақд пул миқдори кўпайиши секинлашди ва 1,9 трлн сўмга ўсди. Август ойида эса февраль ойидан бери илк бор бу кўрсаткич камайди — 79 млрд сўмга. 

Сентябрь ойида муомаладаги нақд пуллар 1,4 трлн сўмга кўпайиб, 43,786 трлн сўмга етганди. Октябрда бу кўрсаткич 8 млрд сўмга камайди. 

Май ойида кенг маънодаги пул массаси рекорд даражада кўпайиб, (+13,3 трлн сўм) 158,5 трлн сўм бўлган эди. Июнда эса бу кўрсаткич деярли ўзгаришсиз қолди. Июлда 159,1 трлн сўмга етди.

Август ойида кенг маънодаги пул массаси 9 трлн сўмга ошган бўлса, сентябрда ўсиш 8 трлн сўмни ташкил қилган. Октябрь ойида кенг маънодаги пул массаси ҳам камайди — 2,9 трлн сўмга.  

Шунингдек, ўтган ойда миллий валютадаги жами пул массаси 679 млрд сўмга ошиб, 124,7 трлн сўмга етган.

Марказий банк томонидан жорий йилнинг дастлабки 6 ойи мобайнида муомалага қўшимча 13,6 трлн сўм нақд пуллар чиқарилган. 

Бундан ташқари, нақд пулга бўлган талабни қондириш мақсадида, 15 июлдан Ўзбекистонда 200 минг сўмлик банкнота муомалага киритилди. 

Аввалроқ Ўзбекистонда тўққиз ойда қанча пул банкоматлар орқали нақдлаштирилгани маълум бўлганди.