2022 йил 19 ноябрь куни «Навоий кон-металлургия комбинати» акциядорлик жамияти Ўзбекистон Журналистлари ижодий уюшмаси билан ҳамкорликдаги «Миллий журналистика: анъаналар давомийлиги ва замонавийлик» мавзусидаги II медиафорумини бошлади.
Иккинчи марта ташкил этилган медиафорумда Ўзбекистон ҳудудларидан ташриф буюрган 50 нафар оммавий ахборот воситалари вакиллари ва журналистлар ҳамда Ўзбекистон Республикасида аккредитациядан ўтган хорижий журналистлар иштирок этмоқда.
Ўзбекистон Журналистлари ижодий уюшмаси раиси Олимжон Ўсаров, Ўзбекистон Миллий ахборот агентлиги бош директори Абдусаид Кўчимов, Ўзбекистон журналистика ва оммавий коммуникациялар университети ректори, Ўзбекистон Миллий медиа ассоциацияси бошқаруви раиси Шерзодхон Қудратхўжа, «Ишонч» ва «Ишонч-Доверие» газеталари бош муҳаррири Ҳусан Эрматов каби таниқли журналистлар – II медиафорум меҳмонлари. Шунингдек, Буюк Британиянинг Reuters, Туркиянинг TRT, Россиянинг «Спутник», Эроннинг «Fars news», Қозоғистоннинг «Хабар» ахборот агентликлари ва бошқа ОАВ вакиллари медиафорумда қатнашмоқда.
Медиафорумининг биринчи кунида иштирокчилар учун «НКМК» АЖ Жанубий кон бошқармасининг Самарқанд вилоят Қўшработ тумани Заркент қўрғонида жойлашган «Зармитан» конига пресс-тур ташкил этилган. Журналистлар кон фаолияти билан яқиндан танишган ҳамда ишчи-ходимлар билан суҳбатлашган.
Тадбирнинг иккинчи кунида Жиззах вилояти Зомин туманидаги «НКМК» санаторийсида «Миллий журналистика: анъаналар давомийлиги ва замонавийлик» мавзусидаги II медиафорумининг очилиш маросими ўтказилади.
Медиафорум давомида халқаро медиа-экспертлар – Озарбайжон, Туркия, Россия, Эрон давлатларининг журналистлари маҳорат дарсларини ўтади. Шунингдек, тадбир иштирокчилари ўртасида маданий тадбирлар ва волейбол, стол тенниси, шахмат ва шашка спорт турлари бўйича мусобақалар ўтказилади.
Маълумот учун: «Навоий кон-металлургия комбинати» акциядорлик жамияти («НКМК» АЖ) жаҳонда олтин ишлаб чиқарувчи йирик компаниялар бешталигига киради. Комбинат ер ости бойликлари захираларини геологик қидириш, қазиб олиш ва қайта ишлашдан то тайёр маҳсулот олишгача бўлган ишлаб чиқариш жараёнлари тўлиқ амалга ошириладиган йирик саноат кластеридир. Комбинат замонавий кон-транспорт ва технологик ускуналар, илғор технологиялар билан жиҳозланган конлар, заводларга эга замонавий корхонадир.
Изоҳ (0)