Сенат ялпи мажлисида давлат бюджетининг 2022 йил 9 ойи якуни бўйича ижроси муҳокама қилинди. Бу ҳақда «Дарё» мухбири хабар бермоқда.
Мажлисда бугунги кунда жаҳон иқтисодиётида кечаётган мураккаб жараёнларга қарамасдан 2022 йилнинг 9 ойида Ўзбекистон иқтисодиётида барқарор ўсиш суръатлари сақлаб қолингани таъкидланди.
Республикада ялпи ички маҳсулот ҳажми 2022 йилнинг январь—сентябрь ойларида ўтган йилнинг мос даврига нисбатан 5,8 фоизга ўсиб, 627 триллион 477 миллиард сўмни ташкил этди.Иқтисодий ўсишнинг асосий драйверлари хизматлар ва қурилиш соҳалари бўлиб, бу соҳалар мос равишда 7,9 ва 6,3 фоизга ўсди. Саноат 5,9 фоиз, қишлоқ хўжалиги 3,6 фоизга ўсди. Ташқи савдо айланмаси ҳажми қарийб 36 миллиард долларни ташкил этиб, ўтган йилнинг 9 ойлик кўрсаткичига нисбатан 27 фоизга ортди. Шундан, экспорт ҳажми 2021 йилнинг мос даврига нисбатан 36 фоизга ошиб, 14 миллиард долларни, импорт ҳажми 22 фоизга кўпайиб, 22 миллиард долларни ташкил этди. Ҳисобот даврида инфляция даражаси йил бошига нисбатан 8,1 фоизни ташкил этди», – деди молия вазири Тимур Ишметов.
Мажлисда маълум қилинишича, ҳисобот даврида давлат бюджети даромадлари давлат мақсадли жамғармаларисиз 147,1 триллион сўмни ташкил этган ва бу 2021 йилнинг мос даврига нисбатан 31,1 триллион (26,8 фоиз) сўмга юқори кўрсаткичдир.
Давлат бюджетининг 2022 йилнинг тўққиз ойидаги харажатлари давлат мақсадли жамғармаларисиз 162,4 триллион сўмни ёки ЯИМга нисбатан 26,4 фоизни ташкил этди.
Сенат аъзолари муҳокама жараёнида 2022 йилнинг 9 ойида давлат бюджети даромад ва харажатларининг ижроси, ажратилган маблағларнинг мақсадли сарфланиши, шунингдек, давлат бюджети даромадлари прогнозининг бажарилишида солиқ ва божхона тўловларининг ундирувчанлик даражасига ҳам эътибор қаратди.
Давлат маблағларидан фойдаланиш самарадорлиги борасида қурилиш соҳасида ўтказилган назорат тадбирларида ҳақиқатда бажарилмаган қурилиш-таъмирлаш ишларини ҳисоботларга қўшиб ёзиш, лойиҳа-смета ҳужжатларида қурилиш материалларини юқори нархларда кўрсатиш каби хато ва камчиликлар аниқлангани таъкидланди.
Ижтимоий ривожлантириш борасидаги давлат дастурларида белгиланган тадбирларни молиялаштиришга ажратилган маблағларнинг мақсадли, ўз муддатида ва тўлиқ ўзлаштирилишида ҳам айрим муаммо ва хатолар мавжудлиги айтилди.
Изоҳ (0)