Республика Гидрометеорология маркази 14—18 ноябрь кунлари кузатиладиган об-ҳаво ҳақида маълумот берди.
Қайд этилишича, 14 ноябрь куни Ўзбекистон ҳудудининг катта қисмида ёғингарчилик кутилмайди, фақат Қорақалпоғистон Республикаси, Хоразм вилоятида атмосфера фронти ўтишида ёмғир ёғади, Бухоро, Навоий вилоятларида эса бироз ёмғир ёғиши мумкин. Кундузги ҳарорат 9—14 даража илиқ атрофида бўлади.
15 ноябрда Ўзбекистон ҳудудининг катта қисмида ёғингарчилик кутилмайди, фақат Волгабўйи ҳудудларидан совуқ ҳаво массалари кириб келиши натижасида Қорақалпоғистон Республикасининг баъзи жойларида ёмғир ёғади, Устюртда ёмғир қорга айланиши эҳтимолдан холи эмас. Ҳаво ҳарорати меъёр атрофида сақланиб туради.
16 ноябрда совуқ ҳаво массаси республиканинг барча ҳудудларига тарқалади. Баъзи жойларда ёмғир ёғади, айрим жойларда ёмғир қорга айланиши мумкин. Қорақалпоғистон Республикаси, Хоразм, Бухоро, Навоий вилоятларида ёғингарчилик кутилмайди. Кундузги ҳаво ҳарорати 5—7 даража илиққача пасаяди, бу ушбу куннинг меъёридан 8—10 даражага пастдир.
17 ноябрда ёғингарчилик кутилмайди, лекин совуқ ҳаво массасининг таъсири сақланиб туради. Ҳаво ҳарорати кечаси 0—2 даража совуққача пасаяди, кундузи қуёш ҳисобига 8—10 даража илиққача исийди.
18 ноябрда Ўзбекистон ҳудудига Эрон ҳудудларидан илиқ ва нам ҳаво массалари кириб келиши кутилмоқда, республика бўйича баъзи жойларда ёмғир ёғиши мумкин. Ҳафта давомида республика бўйича баъзи жойларга туман тушиши мумкин.
14—15 ноябрь кунлари республика бўйича баъзи жойларда шамол 17—22 метр секундгача кучаяди, Қорақалпоғистон Республикаси, Навоий, Жиззах вилоятларининг айрим жойларида шамолнинг кучайиши 25—28 метр секундгача етиши мумкин.
14—18 ноябрь кунлари республиканинг тоғолди ва тоғли ҳудудларида вақти-вақти билан ёғингарчилик (ёмғир, қор) бўлади, 15—16 ноябрда Тошкент, Қашқадарё, Наманган вилоятларида баъзи жойларда ёғингарчилик кучли бўлиши мумкин, бунинг ҳисобига тоғолди ва тоғли ҳудудларда сел-сув тошқин ҳодисалари юзага келиши мумкин.
Изоҳ (0)