Олий Мажлис Қонунчилик палатасининг 14 ноябрь куни бўлиб ўтаётган навбатдаги мажлисида депутат Дониёр Ғаниев Ўзбекистон томонидан Қирғизистонга ёки Қирғизистондан Ўзбекистонга берилаётган ер майдони ижтимоий тармоқларда қизғин муҳокамаларга сабаб бўлаётганини айтиб, ушбу ер майдонларининг тоифаси бўйича маълумотларга ойдинлик киритишни сўради.
Бу саволга бош вазир Абдулла Арипов жавоб қайтарди.
Ҳақиқатан ҳам, Интернет тармоқларида тарқалган маълумотда сизлар айтгандек тасдиқланмаган рақамлар муҳокама қилинган. Андижон сув омбори учун Қирғизистонга Андижон вилояти Қўрғонтепа туманидан 1 минг 19 гектар яйлов ер майдони бериляпти. Албатта, сув омбори майдони 5 минг гектарга яқин, қолган ер майдони қандай компенсация қилинди, деган табиий савол туғилади.Унинг таъкидлашича, агар Ўзбекистон «Андижон» сув омборидан Қирғизистоннинг Боткен вилоятигача ушбу канал ва қўшимча гидротехник иншоотлар қуриб берадиган бўлса, республика бюджетидан кўп маблағ талаб этилади. Бундан ташқари, Андижон ва Фарғона вилоятларидаги 20 дан ортиқ аҳоли пунктлари кўчирилади.Қолган 4 минг гектардан ортиқ ер майдонлари собиқ Иттифоқ даврида (1970 йилларда) Андижон сув омбори учун Ўзбекистон томонидан компенсация тариқасида берилган. Архив ҳужжатларини ўрганиш жараёнида маълум бўлдики, собиқ Иттифоқ даврида Ўзбекистон томонидан 200 км дан ортиқ Кампиробод чап қирғоқ каналини қуриб бериш мажбурияти олинган. Афсуски, ҳар хил сабаблар билан ушбу канал қурилмасдан қолиб кетган. Айнан шу мажбурият бажарилмагани сабабли катта миқдордаги — 8 мингдан 18 минг гектаргача бўлган ер майдонлари ўзлаштирилмасдан қолгани Қирғизистон томонидан узоқ йиллар давомида таъкидлаб келинган, — дейди бош вазир.
Энг ачинарлиси, 2 минг гектардан ортиқ қишлоқ хўжалигида фойдаланилаётган ер майдонларини йўқотишимиз мумкин эди. Шу боис Наманган вилоятининг Поп ва Чуст туманларидаги Ғовасой участкасидаги тоғли ҳудуддан 12 минг 700 гектар атрофида яйлов ер майдони компенсация тарзида берилиши таклиф этилмоқда. Наманган вилоятидан сайланган депутатларимизнинг хабари бор, таклиф этилаётган Ғовасой участкасининг 6 минг гектари баҳсли ҳудуд бўлиб, амалда Қирғизистон фуқаролари томонидан фойдаланиб келинмоқда. Ҳисоб-китоб қиладиган бўлсак, 8 минг гектардан ортиқ ўзлаштирилмаган қишлоқ хўжалиги ер майдони учун 12 минг 700 гектар яйлов майдонини таклиф қиляпмиз.Шуни алоҳида таъкидлаш жоизки, ҳозирда амалиётда чегара бўйича муҳокамаларда ўртача бир гектар экин ери учун 2,5 баробар кўп яйлов ери бериш қўллаб келинмоқда. Таклиф этилаётган қонун лойиҳасида 19,5 минг гектар эмас, балки 13 минг 719 гектар яйлов ер майдонларини компенсация тариқасида Қирғизистон томонига ажратилиши назарда тутилмоқда (4 минг 127 гектари олдин берилган), — дейди Арипов.
Изоҳ (0)