Экология қўмитаси раиси Нарзулло Обломуродовнинг айтишича, президент бошчилигида мамлакатда амалга оширилаётган «Яшил макон» умуммиллий лойиҳаси энди Туркий давлатлар ташкилоти даражасига ҳам ташаббус сифатида олиб чиқилмоқда.
Хусусан, 11 ноябрь куни Туркий давлатлар ташкилоти Самарқанд саммити доирасида ташкилотга аъзо ва кузатувчи мақомидаги мамлакатлар давлат раҳбарлари иштирокида Регистон майдонида кўчат экиш тадбири ўтказилиши режалаштирилган.
Шунингдек, Туркий давлатлар ташкилотига аъзо бўлган Туркия, Озарбайжон, Қозоғистон, Қирғизистон ҳамда кузатувчи мақомига эга бўлган Венгрия ва Туркманистон давлатлари пойтахтларида ҳам бир вақтнинг ўзида кўчат экиш тадбирлари уюштирилади. Хусусан, Озарбайжонда 11 ноябрь куни 111 минг 111 та дарахт кўчати ўтқазилиши режалаштирилмоқда.
«Яшил макон» умуммиллий лойиҳаси доирасида йилига 200 миллион дарахт ва бута кўчатлари экилади. Бу орқали шаҳар ҳамда туман марказларида яшил майдонлар 8 фоиздан 30 фоизга етказилади. Ўзбекистондаги 10 мингга яқин маҳаллаларда мавсум давомида, яъни 40 кун мобайнида 75 миллионта кўчат экилади.
Бу бир кунда 1 миллион 875 мингта кўчат ўтқазилади дегани. Яъни ҳар бир маҳаллага бир кунда ўртача 7 500 тадан ниҳол экилади. 9 ноябрь ҳолатига кўра республика ҳудудида 24 миллиондан ортиқ кўчат экилди.
Изоҳ (0)