Дунёдаги энг йирик криптовалюта биржаси Binance рақобатдошини сотиб олишга қарор қилди

Дунёдаги энг йирик криптовалюта биржаси Binance АҚШдан ташқаридаги рақобатдоши FTX платформасининг барча активларини сотиб олиш ниятида эканлигини маълум қилди. Бу ҳақда MarketWatch’га таяниб, «Интерфакс» хабар бермоқда.

Таклиф этилаётган келишув шартлари ошкор этилмаган. Binance асосчиси ва раҳбари Чангпенг Чжао ўзининг микроблогида компанияси яқин кунларда активларни тегишли экспертизадан ўтказишни режалаштираётганини ёзди.

Уларда жиддий ликвидлик инқирози бор, — деб ёзган директор.

FTX бош директори Сем Банкмен-Фрид твитида Binance билан стратегик келишувни тасдиқлади ва бу АҚШ активларига алоқадор эмаслигини таъкидлади.

Бирлашиш ҳақидаги хабарга кўра, 8 ноябрь куни асосий сессияда Coinbase Global савдо платформасининг акциялари 11 фоизга тушиб кетди. Охирги уч ой ичида компания капиталлашуви икки баробарга камайди.

Бу катта иш. Binance ва FTX Coinbase билан тўғридан-тўғри рақобатлашмаса-да, биз бу бирлашиш рақобатбардош ландшафтдаги тектоник силжишни англатади деб ишонамиз, — деди Бернштейн таҳлилчиси Ҳаршита Рават.

8 ноябрь куни савдо пайтида биткоин курси 16,8 фоизга тушди, аммо кейин йўқотишлар камайди. 9 ноябрь эрталаб криптовалюта 1,5 фоизга қадрсизланди.

Аввалроқ биткоин 18 минг долларгача қулагани, бу 2020 йил ноябрь ойидан бери энг паст кўрсаткич эканлиги ҳақида хабар берилганди.