2022 йилнинг ўн ойи давомида Россия—Хитой товар айирбошлаш ҳажми ўтган йилнинг шу даврига нисбатан 33 фоизга ўсиб, 153,9 миллиард долларни ташкил этди. Бу ҳақда «РБК» хабар берди.
Эришилган кўрсаткич ўтган йилги ўзаро товар айирбошлаш ҳажмидан (147,2 миллиард доллар) ошиб кетди, бу Москва ва Пекин учун рекорддир.
2022 йилда Россия—Хитой савдосининг кучли ўсиши февраль ойидан бошланган Ғарбнинг қаттиқ санкцияларидан кейин Россия иқтисодиётининг асосий воқеаларидан бирига айланди.
Россия катта ҳажмдаги нефть ва кўмирни Хитойга йўналтирди ва Ғарб мамлакатларига етказиб беришни тўхтатди.
Хитой компаниялари, ўз навбатида, кўплаб Ғарб компанияларининг Россия бозоридан чиқиб кетишидан (ихтиёрий равишда ёки санкциялар туфайли) фойдаланиб, Россияга хом ашё етказиб беришни кескин оширди.
2022 йил октябрь ойида Хитойнинг Россияга маҳсулот экспорти ўтган йилнинг шу даврига нисбатан 34,6 фоизга ўсиб, 7,4 миллиард долларни ташкил этди, Россиядан товарлар импорти эса 34,3 фоизга ўсиб, 10,2 миллиард долларни ташкил этди.
Бироқ 2022 йил сентябрь ойига нисбатан экспорт 7,4 фоизга (апрель ойидан бери биринчи ойлик пасайиш) ва импорт 4 фоизга камайди.
Умуман олганда, октябрь ойида Хитойнинг дунёнинг барча мамлакатларига экспорти йиллик ҳисобда 0,3 фоизга камайди, бу 2020 йил май ойидан бери доллар курсидаги биринчи бундай пасайишдир.
2021 йилда Россиянинг энг йирик савдо шериги Европа Иттифоқи (жами 27 мамлакат) бўлган, бу Россия ташқи айланмасининг 36 фоизини ташкил қилган.
Европанинг Bruegel таҳлил марказининг ҳисоб-китобларига кўра, август ойида ЕИ ва Россия ўртасидаги товар айирбошлаш ҳажми 19,5 миллиард долларга қисқарган, Хитойнинг Россия билан савдоси эса 19,2 миллиард долларгача ошган. Кузда Хитой—Россия савдоси йиллик кўрсаткичларда ўсишда давом этган.
Октябрь ойи учун Хитой экспорти ва импортининг Россия билан аниқ товар тоифалари бўйича тақсимоти ҳали ошкор қилинмаган.
Аввалроқ Хитой Тайвандан воз кечиши ва бунинг ўрнига Россия шарқини эгаллаб олиши мумкинлиги ҳақида хабар берилганди.
Изоҳ (0)