Ўзбекистоннинг Хитойдаги элчихонаси томонидан қишлоқ хўжалиги маҳсулотлари экспорти кўламини ошириш, маҳаллий корхоналарга салоҳиятли хорижий ҳамкорлар топиш ва ишончли экспорт шартномаларини тузишда кўмаклашиш мақсадида «Ўзбекистон мева-сабзавот маҳсулотларини Хитой бозорига экспорти имкониятлари» мавзусида онлайн-тақдимот ташкил этилди, деб хабар бермоқда «Дунё» ахборот агентлиги.
Қайд этилишича, Ўзбекистон экспортчилар уюшмаси ҳамда Хитойнинг Шинжон-Уйғур автоном ҳудуди тижорат бошқармаси, «Хитой—Евросиё Экспо» ташкилий қўмитаси ҳамкорлигида ўтказилган тадбирда икки давлатдан 150 дан ортиқ йирик экспортчи ва импортчи корхоналар, уюшмалар вакиллари иштирок этган.
Маълумот учун, Шинжон-Уйғур автоном ҳудудининг жўғрофий жойлашуви ва транспорт имкониятларидан келиб чиққан ҳолда Ўзбекистоннинг аксарият қуритилган ва тоза мева-сабзавот маҳсулотлари Хитой бозорига айнан мазкур минтақа орқали импорт қилинади.
Тадбир аввалида Ўзбекистон—Хитой ҳамкорлигининг бугунги ўсиш динамикаси, 2022 йилда мамлакатлар ўртасидаги стратегик ҳамкорликни ҳар томонлама мустаҳкамлашга кучли туртки берган олий даражадаги учрашув ва музокаралар тўғрисида маълумот берилган.
«Хитой—Евросиё Экспо» бош котиби ўринбосари Меҳригул Турсун ўз чиқишида сўнгги йилларда Хитой ва Ўзбекистон «Бир макон — бир йўл» ташаббуси доирасида ўзаро ҳамкорликни ҳар томонлама ривожлантириб, самарали натижаларга эришаётгани, йирик лойиҳаларни биргаликда амалга ошираётгани, Самарқанд саммити доирасида «Ўзбекистон—Қирғизистон—Хитой» темир йўли лойиҳаси бўйича муҳим қадамлар қўйилгани ва бу келгусида икки томонлама савдони кескин оширишда янги имкониятлар очишини таъкидлаган.
Тадбир давомида турли вилоятларда фаолият юритаётган корхоналар вакиллари Ўзбекистонда қишлоқ хўжалик соҳасини ривожлантириш бўйича олиб борилаётган ислоҳотлар, мева-сабзавотларни қайта ишлаш ва уларнинг экспорт салоҳиятини тақдим этган. Хитойлик импортчиларга ўз маҳсулотларини таклиф этиб, кейинги мавсум учун буюртмалар қабул қилишга тайёрлигини билдирган.
Учрашув якунида ўзбек томони хитойлик тадбиркорларни қизиқтирган саволларга батафсил жавоб берган. Икки томон компаниялари ўртасида B2B шаклда музокаралар учун маълумотлар алмашилган.
Изоҳ (0)