«Улар Америкада сўз эркинлигини йўқ қилишга уринмоқда». Илон Маск Twitter даромади кескин камайганини эълон қилди

Миллиардер Илон Маск Twitter’нинг даромади кескин камайганини эълон қилди. Бу ҳақда у ўз Twitter саҳифасида маълум қилди. 

Twitter’нинг даромадлари фаол гуруҳларнинг реклама берувчиларга босим ўтказиши туфайли кескин камайди. Бироқ контентни модерация қилишда ҳеч нарса ўзгармади ва биз фаолларни тинчлантириш учун қўлимиздан келганини қилдик. Жиддий хато! Улар Америкада сўз эркинлигини йўқ қилишга уринмоқда, — деб ёзади у.

27 октябрь куни Маск Twitter’ни сотиб олиш бўйича келишувни якунлади. 31 октябрь куни АҚШ Қимматли қоғозлар ва биржалар комиссияси (SEC) маълумотлар базасида эълон қилинган ҳужжатларга кўра, Маск компания директорлар кенгашини тарқатиб юбормоқчи.

Маск Twitter’ни сотиб олгач, дарҳол компания раҳбариятининг бир қатор аъзоларини ишдан бўшатди. 

Кейинчалик Bloomberg агентлиги тадбиркор ходимларни деярли ярмига қисқартиришни режалаштираётгани ҳақида хабар берди.

Аввалроқ Маск Twitter’да верификация белгиси учун ойлик тўлов жорий этмоқчилиги ҳақида хабар берилганди.