ДХХ Ўзбекистоннинг бир қатор ҳудудларида наркотик моддалар савдосига қарши тезкор тадбирлар ўтказди.
ДХХнинг Тошкент шаҳар бўйича бошқармаси ходимлари томонидан Юнусобод туманида ўтказилган тезкор тадбирда 1976 йилда Бухоро вилоятида ва 1958 йилда Жиззах вилоятида туғилган икки фуқаро 874 грамм опий моддасини 18 минг долларга сотмоқчи бўлганларида ушланган.
Шунингдек, тезкор тадбир давом эттирилиб, Тожикистондан келтирилган ушбу наркотик модданинг ҳақиқий эгаси ҳисобланган Самарқанд вилоятининг Ургут туманида яшовчи, 1956 йилда туғилган шахс ҳам қўлга олинган.
1976 йилда Сирдарё вилоятида туғилган, муқаддам гиёҳвандлик воситалари савдоси билан шуғулланганлиги учун жиноий жавобгарликка тортилган фуқаро 1985 йилда Тошкент шаҳрида туғилган таниши билан Тошкент вилоятининг Оққўрғон туманига бориб, учинчи шахслар томонидан қўшни Тожикистондан ўтказилиб, хуфиёна жойга яшириб кетилган икки дона ўрамдаги наркотик моддани қабул қилиб олган ва уни ўзаро тенг бўлиб, бири Бўка тумани томон, иккинчиси эса Тошкент шаҳри томон йўл олган.
ДХХнинг Сирдарё вилояти бўйича бошқармаси ва вилоят божхона бошқармаси ходимлари томонидан ўтказилган тезкор тадбирда дастлаб улардан бири Оҳангарон туманида 988 грамм гашиш билан, иккинчиси бўлса Тошкент шаҳрининг Яшнобод туманида 887 грамм гашиш билан қўлга олинган.
Бошқа бир ҳолатда Қувасой шаҳрида яшовчи, 1987 йилда туғилган, муқаддам судланган фуқаро Қирғизистондан контрабанда йўли билан ўтказилган 1 килограмм 61 грамм гашишни келгусида сотиш мақсадида Фарғона шаҳрига олиб келган вақтида ДХХ ходимлари томонидан қўлга олинган.
Фарғона шаҳрида яшовчи, 1992 йилда туғилган икки фуқаро ҳам Қирғизистондан келтирилган 974 грамм гашишни Қува туманида қабул қилиб, вилоят маркази томон ҳаракатланган вақтларида ушланган.
Наманган вилоятининг Мингбулоқ туманида ўтказилган тезкор тадбирда Андижон вилоятининг Қўрғонтепа туманида яшовчи, 1983 йилда туғилган, муқаддам гиёҳвандлик воситалари ноқонуний айланмаси билан боғлиқ жинояти учун судланган фуқаро ва унинг 1987- йилда туғилган шериги 430 грамм гашишни сотмоқчи бўлганида қўлга олинган.
Ўз навбатида улар Қирғизистондан контрабанда йўли билан олиб келинган мазкур гиёҳвандлик воситасини Қўрғонтепа туманида яшовчи, 2000 йилда туғилган, муқаддам судланган шахсдан олгани аниқланиб, у ҳам ушланган.
Ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)