AQSH Rossiya va Xitoydan KXDRni yadro sinovlari o‘tkazish fikridan qaytarishni so‘ramoqda — Reuters

AQSH Rossiya va Xitoy KXDRga o‘z ta’sirini o‘tkazib, uni yadro sinovlari o‘tkazish fikridan qaytarishini xohlagan bo‘lardi. Bu haqda yuqori mansabli amerikalik amaldor Reuters’ga ma’lum qilgan.

Vashingtonning fikricha, Pekin va Moskvada Shimoliy Koreyani yadro quroli sinovlaridan voz kechishga ko‘ndirishda yordam beradigan ta’sir vositalari bor.

“Xitoy va Rossiya azaldan KXDRning yadro dasturiga qarshi bo‘lib keladi”, — dedi agentlik suhbatdoshi. “Ular KXDRni yadro sinovlari o‘tkazmaslikka ko‘ndirishga urinish uchun o‘z ta’sir vositalarini qo‘llashiga ishonamiz va albatta, buni kutyapmiz”, — dedi u.

Shu bilan birga, mansabdor Pxenyan bunday sinovlarni qachon o‘tkazishi mumkinligi haqida hech narsa deya olmadi. AQSH Shimoliy Koreya 2017-yildan buyon birinchi marta yadro sinovlarini qayta boshlashga tayyorlanayotgani haqida may oyidan buyon aytib keladi.

“Ular buni qilishi mumkin, deb o‘ylaymiz”, — dedi u.

Pxenyan yadro sinovlarini qaytadan boshlashni Xitoydagi saylovlar va Shimoliy Koreyada COVID-19 avj olishi tufayli keyinga qoldirgan bo‘lishi mumkin.

Pxenyan bir necha marta raketalar uchirgach, AQSH BMT Xavfsizlik kengashiga murojaat qilib, 4-noyabr, juma kuni Shimoliy Koreya bo‘yicha majlis o‘tkazishni so‘ragandi.

Eslatib o‘tamiz, avvalroq KXDR so‘nggi uch kun ichida to‘rtinchi marta Yapon dengiziga qarata raketa uchirdi, bu safar Pxenyan uchta qisqa masofali ballistik raketani uchirgan.

Raketalar parvozlari AQSH va Janubiy Koreyaning Vigilant Storm qo‘shma harbiy havo mashg‘ulotlari fonida yuz bermoqda, KXDR unga qarshi chiqqan. Mashqlar 31-oktabr kuni boshlangan bo‘lib, 4-noyabrga qadar davom etadi. Manyovrlarga 240 dan ortiq samolyotlar, shu jumladan, Amerikaning takomillashtirilgan F-35A ko‘rinmas qiruvchilari jalb qilingan.

KXDR Seul va Vashingtonning mana shu va boshqa mashg‘ulotlari sababli, “Koreya yarim oroli qizg‘in nuqtaga aylantirib qo‘yilgani, u yerda harbiy keskinlik dunyo bo‘yicha eng kuchli ekani, mintaqadagi xavfsizlik muhiti esa yanada jiddiylashganini aytgandi.

Oktabr oyida Shimoliy Koreya besh martadan ko‘proq raketalar uchirdi, shuningdek, qanotli raketalarni sinovdan o‘tkazdi. Bundan tashqari, Janubiy va Shimoliy Koreya harbiylari o‘rtasida 24-oktabr kuni otishma yuz berdi: KXDR kemasi Sariq dengizda demarkatsiya chizig‘ini kesib o‘tgani tufayli Seul ogohlantiruvchi o‘t ochdi, Pxenyan bunga javoban baravar o‘t ochish reaktiv tizimlaridan 10 ta snaryad uchirdi.