Россия Ташқи ишлар вазирлиги ядро урушига йўл қўймаслик ҳақида баёнот эълон қилди

Россия Ташқи ишлар вазирлиги ядро мамлакатлари бешлигини (Россиядан ташқари — АҚШ, Буюк Британия, Франция ва Хитой) «бир-бирининг ҳаётий муҳим манфаатларини чеклашга уринмасликка» чақирди ва бу ҳалокатли оқибатларга олиб келишини қайд этди.

ТИВ томонидан эълон қилинган «Ядро уруши олдини олиш тўғрисида»ги баёнотда айтилишича, Россия учун бирламчи вазифа — ядро давлатларининг ҳарбий тўқнашувига йўл қўймаслик. Россия ҳарбий доктринада келтирилган ҳолатлардагина ядро қуролини қўллаши мумкин.

«Россия доктринасида ушбу соҳадаги ҳолатлар жуда аниқ қилиб белгиланган, улар фақат мудофаа йўналишига эга бўлиб, кенг талқин қилинишига йўл қўйилмайди», — дейилади ТИВ баёнотида.

Унда таъкидланишича, Россия томонидан ядро қуроли қўлланилиши, ҳарбий доктринага мувофиқ, фақат оммавий қирғин қуроли иштирокидаги тажовузга ёки давлатнинг мавжудлиги хавф остида бўлган тақдирда, оддий қурол-яроғдан фойдаланиб амалга оширилган тажовузга жавобан мумкиндир.

Россия ТИВ ядровий «бешлик» мамлакатларини ядровий кескинлик вазиятини ҳал қилиш устида ишлашга тайёрлигини амалда кўрсатишга чақирди.

Аввалроқ Россия ҳарбий раҳбарияти октябрь ойида Москва Украинада тактик ядро қуролини қандай ва қаерда қўллаши мумкинлигини муҳокама қилиш учун учрашувлар ўтказгани маълум бўлган эди.

Уруш бошланганидан кейин Россия ҳукумати агар мамлакат ҳудудий яхлитлигига таҳдид туғилса, ядро қуролидан фойдаланиши мумкинлигини бир неча бор айтган.

Сентябрь ойида Путин ядровий зарба ҳақидаги гаплар «пўписа эмас»лигини таъкидлади. Октябрь ойи охирида у Россиянинг Украинага ядровий зарба беришга «на сиёсий, на ҳарбий истаги йўқ»лигини айтди.

1 ноябрь куни Россия Федерацияси Хавфсизлик кенгаши раиси ўринбосари Дмитрий Медведев агар Киев Россия томонидан аннексия қилинган Украина ҳудудларини куч билан қайтаришга ҳаракат қилса, бу ядровий зарба учун тўғридан-тўғри баҳона бўлишини айтди.