Германия канцлери Олаф Шольц Россия президенти Владимир Путин билан муросага келиш тарафдори, деди Туркия президенти Ражаб Тоййиб Эрдўғон журналистларга.
«Етакчилар дипломатияси муаммоларни ечишда ҳал қилувчи аҳамиятга эга. Ҳатто Германия канцлери Шольц бир ой аввал Путинга нисбатан умуман бошқача позицияга эга эди, энди эса Россияга муносабатини ўзгартириб, битимга келиш муҳимлигини таъкидлади», — деган Эрдўғон.
Шольц аввалроқ Россия билан мулоқот олиб бориш ва Украинада дипломатик ечим топиш муҳимлиги ҳақида гапирганди. Уларнинг телефон орқали сўнгги суҳбати сентябрда бўлиб ўтган, шундан кейин Германия канцлери Путин Украинада ҳарбий операция бошлаш қарори хато бўлганини ҳали тушуниб етмаганини айтганди. Бир ойдан кейин Кремль Путин ва Шольц камроқ мулоқот қилаётганига сабаб — канцлер «сўнгги вақтларда Россия томони позициясига қулоқ солиш истагини билдирмаётгани» ва воситачилик ҳаракатларида қатнашишни хоҳламаётгани эканини маълум қилди.
Туркия президенти 1 ноябрь куни Путин ва Шольц билан телефон орқали алоҳида-алоҳида суҳбатлашди. Кремль хабарига кўра, у Россия президенти билан дон битимини ҳамда Путиннинг Озарбайжон ва Арманистон етакчилари билан учрашуви якунларини муҳокама қилган. Шольц билан ҳам у дон битими ҳақида гаплашган, шунингдек, «Россиянинг ядровий таҳдидлари — масъулиятсизлиги борасида бир фикрга келган».
Изоҳ (0)