Андижон ва Наманган вилоятларида кредит маблағларини талон-торож қилиш ҳолатлари аниқланди.Бу ҳақда Иқтисодий жиноятларга қарши курашиш департаменти хабар бермоқда.
Таъкидланишича, Бош прокуратура ҳузуридаги департаментнинг Булоқбоши тумани бўлими томонидан терговга қадар текширув ўтказилган. Унда «Ш.А.» МЧЖ раҳбари Р.А. банк филиалидан ажратилган 500 миллион сўм имтиёзли кредит маблағи эвазига таъминотчи корхонадан қабул қилиб олган маиший техника жиҳозлари сотувидан тушган маблағларни кредит қарздорлигини сўндиришга йўналтирмасдан, ўзлаштириш йўли билан талон-торож қилгани аниқланган.
Шу каби, департаментнинг Наманган вилоят бошқармаси томонидан ўтказилган терговга қадар текширувда «К» МЧЖни норасмий бошқариб келган М.К. ва бошқалар МЧЖга тикув дастгоҳларини сотиб олиш учун ажратилган 170 миллион сўм имтиёзли кредит маблағини бошқа мақсадларда фойдаланиб, ўзлаштириш йўли билан талон-торож қилгани аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)