Таълим масканлари тасарруфидаги бинолар ва ер участкалари Халқ таълими вазири рухсатисиз бошқаларга ўтказилмаслиги бўйича махсус қарор бўлишига қарамай 198 та ҳолатда 70 гектар ер майдони ва 19 та бинолар ҳокимлар қарори билан мактаблардан олиб қўйилган ёки ўзбошимчалик билан эгаллаб олинган.
Бу ҳақда кеча, 1 ноябрь куни давлат раҳбари Шавкат Мирзиёевнинг топшириғи асосида Президент Администрацияси раҳбари Сардор Умрзоқов раислигида ўтказилган йиғилишда айтиб ўтилди.
Таъкидланишича, президент қарорига мувофиқ, мактаб тасарруфидаги ер майдонлари ва бинолар фақат Халқ таълими вазири розилиги билангина олиниши мумкин. Лекин вазир рухсатисиз давлат захирасига олинган, уй-жой ёки ижтимоий бино қуриб олинган ҳолатлар ҳам кўп.
Йиғилишда бош прокуратурага вазиятни назоратга олиш ва қонуний чоралар кўриш, ерларни қайтариш бўйича судга даъво аризалари киритиш вазифаси юкланди.
Эслатиб ўтамиз, президент Шавкат Мирзиёев 31 август куни Мустақиллик байрами муносабати билан сўзлаган нутқида 2026 йилгача Тараққиёт стратегияси доирасида 5 та асосий вазифани белгилаб берган эди. Улардан биринчиси айнан таълим соҳасига оид бўлганди.
Изоҳ (0)