Кўчада қолган мактаб ўқувчилари воқеаси ортидан Шўрчи ҳокимига ҳайфсан берилди, икки нафар масъул ишдан олинди
«Дарё» нашрида Сурхондарё вилоятининг Шўрчи туманида 66-мактаб ўқувчилари таҳсил олаётган бино тортиб олиниб, ўқувчилар кўчада қолгани, одамлар хонадонида ўқишга мажбур бўлаётгани ҳақида хабар берилганди.
Бу ҳолат бир ҳафтадан бери давом этмоқда. Вазият ҳақида Халқ таълими вазирлигига ҳам мурожаат қилдик. Муаммони айтдик, аммо улар бунга эътибор бермаяпти, — деганди мазкур ҳолат ҳақида таҳририятга мурожаат қилган ота-оналардан бири.
ЎзАнинг хабар беришича, Президент админстрацияси раҳбари Сардор Умурзоқов раҳбарлигидаги йиғилишда мазкур воқеа сабаб Шўрчи тумани ҳокими Бахтиёр Худойбергановга ҳайфсан берилган.
Маълум қилинишича, кеча, 1 ноябрь куни Президент администрацияси раҳбари Сардор Умурзоқов раислигида халқ таълими тизимидаги мавжуд муаммоларга бағишланган видеоселектор йиғилиши бўлиб ўтган.
Унда Сурхондарё вилоятининг Шўрчи туманида оддий мактабни ихтисослаштирилган мактабга айлантириш чоғида масъуллар томонидан йўл қўйилган ўзбошимчалик ва ўз ишига совуққонлик жиддий танқид қилинган.
Бу нима деган гап?! Инсон қадри шуми? Тошкентда, ёзда салқин, қишда иссиқ кабинетларда ўтирган амалдорлар болалари қишлоқнинг лой йўлларида ҳар куни 10 километрлаб юришига, аҳоли уйларида ўқишига рози бўлишармиди? Яна уйларда таълим бераётган ўқитувчиларга маош ҳам берилмаяпти экан. Ўқитувчининг нима айби бор бу ерда?! — дея эътироз билдирган Сардор Умурзоқов.Қўшимча қилинишича, мазкур воқеа ортидан Шўрчи тумани ҳокими Бахтиёр Худойбергановга ҳайфсан берилган, ўқувчиларни аҳоли уйларида ўқитишга бош қўшган туман ҳокими ўринбосари ва халқ таълими бўлими мудири лавозимидан озод этилган.
