Қорақалпоғистондаги мактабларда бепул тушлик тарқатилаётгани юзасидан текширув ўтказилади

Февраль ойида Президент Шавкат Мирзиёев Қорақалпоғистон Республикасига ташрифи чоғида Қорақалпоғистон ҳамда Хоразм мактабларидаги бошланғич синф ўқувчилари учун бепул тушликни йўлга қўйиш топшириғи берилган эди.

«Юксалиш» умуммиллий ҳаракати 31 октябрь куни жорий ўқув йилидан бошлаб Хоразм вилоятида кейтеринг усулида бепул овқат бериш 94 фоиз мактабларда йўлга қўйилгани, Қорақалпоғистонда эса тендер танловларини ўтказиш давом этаётганлиги боис ушбу амалиёт ҳали бошланмагани ҳақида хабар берган эди.

Таъкидланишича, бепул овқат билан таъминлашнинг ўз вақтида ташкил этилмаганлигининг асосий сабаблари сифатида ҳукумат қарорининг кеч қабул қилинганлиги ва тасдиқланган таомномага мувофиқ ҳар бир ўқувчига ажратилган маблағ миқдори тадбиркорларда кам қизиқиш уйғотганлигини келтириш мумкин.

Шавкат Мирзиёев топшриғи билан кеча, 1 ноябрь куни Президент Админстрацияси раҳбари Сардор Умрзоқов раислигида ўтказилган халқ таълим тизими бўйича йиғилишда ушбу масала юзасидан ҳам сўз борди.

Жумладан, Сардор Умрзоқов мазкур масала юзасидан Қорақалпоғистон Республикаси Жўқорғи Кенгеси раиси Аманбай Оринбаевга мурожаат қилди. Жўқорғи Кенгес раисининг маълум қилишича, 19 сентябрдан бошлаб айрим мактабларда бепул тушлик бериш бошланган. Шунингдек, октябр ойида ҳам тендер танловлари ўтказилгач яна бошқа мактабларда ҳам ишлар бошланган.

Президент Админстрацияси раҳбари Сардор Умрзоқов Қорақалпоғистонда ўқувчиларга бепул тушлик тарқатилаётгани бўйича текширув ўтказиш юзасидан Халқ таълим вазирлиги ҳамда Бош прокуратурага тегишли топшириқ берди.