Эден Азар АПЛга қайтиши мумкин

«Реал» ҳужумкор ярим ҳимоячиси Эден Азар фаолиятини Англия Премер Лигасида давом эттириши мумкин.

Футболчи ва «Реал» раҳбарияти ҳамкорлик якунига етаётганини тушуниб турибди. ЖЧ—2022 дан сўнг томонлар ярим ҳимоячининг бошқа клубга ўтиш масаласини кўриб чиқади. Иккала томонга ҳам фойдали бўлган шартнома имзоланиши кутилмоқда.

Defensa Central маълумотларига кўра, бельгиялик футболчининг хизматларига «Астон Вилла» қизиқиш билдирган. Жамоанинг янги бош мураббийи Унаи Эмери ушбу трансферга рухсат бериши мумкин. Эмери футболчи жамоа ҳужум чизиғининг етакчиси бўлишига ишонмоқда.

«Реал» Азарнинг трансферидан муносиб пул олмоқчи. Мадрид жамоаси бельгияликни 2019 йилнинг ёзида «Челси»дан сотиб олганди. «Реал» трансфер учун 100 миллион евродан ошиқ пул сарфлагани айтилганди.

31 ёшли Эден жорий мавсум Ла Лигада 3 та ўйинда иштирок этди.