Юрген Клопп «Ливерпуль» бошқарувида 400 та ўйин ўтказди. Бу сўнгги 39 йил ичидаги рекорд натижа

«Ливерпуль» Чемпионлар Лигаси 6-турида «Наполи»ни 2:0 ҳисобида мағлубиятга учратди.

Бу мерсисайдлар устози Юрген Клопп учун «Ливерпуль» бошқарувидаги 400-ўйин бўлди.

Клопп ушбу натижага эришган клуб тарихидаги 4-мураббийга айланди. Ундан аввал Билл Шенкли (783 ўйин, 1959—1974 йиллар), Том Уотсон (678, 1896—1915) ва Боб Пейсли (535, 1974—1983) ушбу кўрсаткични қайд этган. Клопп бу довонни босиб ўтган XXI асрдаги ва охирги 39 йил ичидаги илк мураббийга айланди.

Бу давр ичида немис мутахассиси қўл остидаги жамоа 244 ғалаба, 90 дуранг ва 66 та мағлубият қайд этди. Тўплар нисбати — 833:394.

Шунингдек, Юрген жамоа билан Чемпионлар Лигасидаги 100-баҳсини ўтказди. Клопп бу ўйинларнинг 46 тасида ютган, 28 ўйинда дуранг қайд этилган бўлса, 26 ўйин мағлубият билан тугаган.

«Қизиллар» Чемпионлар Лигасининг кетма-кет бешта ўйинида ғалаба қозонди. Бундан аввал клуб икки бор шундай натижага эришган: 2007/08 йилги мавсумда 5 та, 2021/22 йилги мавсумда эса 7 та ўйиндан иборат ғалабали серия қайд этилган.