«Бавария» Чемпионлар Лигасида иккита тарихий рекорд қайд этди

«Бавария» Европа Чемпионлар Лигасининг 6-турида «Интер» устидан 2:0 ҳисобидаги ғалабани қўлга киритди.

Мюнхенликлар кетма-кет икки мавсум гуруҳ босқичидаги барча ўйинни ғалаба билан якунлади. Бу мусобақа рекорди ҳисобланади, ҳали ҳеч қайси жамоа қаторасига икки мавсум гуруҳни ғалабали серия билан якунламаганди.

Немис жамоаси жорий мавсум ЕЧЛ гуруҳ босқичида «Интер», «Барселона» ва «Виктория Плзен»ни мағлубиятга учратди. Ўтган мавсумда «Бенфика», «Барселона» ва «Динамо Киев»га қарши учрашувлар ғалаба билан тугаганди.

«Бавария» ўз тарихида учинчи марта гуруҳ босқичини ғалабали серия билан якунлади. Бу ҳам рекорд ҳисобланади. 2019/20 йилги мавсумда ҳам Мюнхен жамоаси шундай натижага эришган.

Бу кунга қадар «Милан» (1992/93), «ПСЖ» (1994/95), «Спартак» (1995/96), «Барселона» (2002/03), «Реал» (2011/12, 2014/15), «Аякс» (2021/22) ва «Ливерпуль» (2021/22) гуруҳ босқичини очко йўқотмаган ҳолда якунлашга эришган.

Шунингдек, «Бавария» Чемпионлар Лигаси гуруҳ босқичидаги ғалабали сериясини 13 та ўйинга етказиб, бу борада ўзи ўрнатган рекордни яхшилаб олди.