Япония ҳукумати 29 сентябрдан 27 октябргача миллий валютани қўллаб-қувватлаш мақсадида валюта бозоридаги интервенциялар учун 6,35 триллион иена (43,06 миллиард доллар) сарфлади. Бу ҳақда мамлакат молия вазирлигига таяниб «Интерфакс» хабар бермоқда.
Жорий йилда иена долларга нисбатан деярли 30 фоизга тушиб кетди, бу асосан Япония ва АҚШ марказий банкларининг пул-кредит сиёсатидаги фарқлар туфайли.
Япония банки ўта юмшоқ пул шароитларини сақлаб қолган бўлса-да, Фед кўп йиллик рекорд даражадаги юқори инфляцияга қарши курашиш учун пул-кредит сиёсатини кучайтиришни давом эттирди.
Шу фонда, 22 сентябрь куни Япония ҳукумати 24 йил ичида биринчи марта валюта бозорига аралашишга қарор қилди, бу эса иенани қисқа вақт давомида қўллаб-қувватлади.
Бироқ кейинроқ 21 октябрда миллий валюта 32 йил давомида минимал даражага тушиб, 1 доллар учун 151,90 иенага етди.
Шундан сўнг молия вазири Шуньичи Сузуки иена курсининг кескин пасайиб кетишидан хавотир билдирди ва миллий валютани қўллаб-қувватлаш учун интервенция қилишга тайёрлигини билдирди.
Шу билан бирга, Сузуки журналистларга интервенция содир бўлган ёки бўлмагани ҳақида изоҳ бермаслигини айтди.
Аввалроқ иена курси 32 йиллик энг паст даражага тушиб кетгани ҳақида хабар берилганди.
Мавзуга доир:
Изоҳ (0)